Yubu 32

Acaki lok pa Eliu

1Jo meno adeki guweko gamo dog Yubu pien Yubu onongo tamoni kite tye atir. 2Lacen Eliu wod pa Barakel ma jo Buj, me dogola pa Ram, okeco ikom Yubu. En okeco ikom Yubu pi tamo ni en aye loke tye atir, pe Lubanga. 3En bene okeco ikom lurem Yubu adeki, pien pe gunongo lagam mo, kadi bed ceng gutito ni Yubu aye oroco. 4Eliu kong okuru ka co adeki guloko ki Yubu, pien onongo gutegi makato en. 5Ento ka en oneno ni gamo dog Yubu oloyo co adeki, kiniga ocako make.

6Eliu ma wod pa Barakel ma jo Buj owaco ni,

“An pud latin, wun dong wutegi;

pimeno abedo ki lworo me tito ki wun gin ma atamo.

7Onongo atamo ni, ‘Wek ludito aye guloki,

wek ludito me mwaka gunywak ryekogi.’

8Ento cwiny matye i dano,

ma yweyo pa Won Twer Ducu,

aye gin mamiyo dano niang ilok moni.

9Man teloke ni pe tiyo aye weko dano bedo ryek,

nyo ni jo ma otegi aye gingeyo gin matye atir.

10Pimeno awaco ni wuwiny loka;

wek an bene anyut tama.

11Nen, abedo kakuru lok ma wuwaco,

aciko ita wek awiny ryeko ma wubedo kalokone,

kun wuyenyo kit lok ma myero wuwac.

12Onongo aketo cwinya kawinyo lokwu,

ci nen, onongo pe tye ngat mo ikinwu ma onyutu ni lok pa Yubu pe tye atir,

nyo ma ogamo lok doge kakare.

13Wugwoke, wuwek waco ni,

‘Wan dong walimo ryeko;

Lubanga aye twero juku Yubu, pe dano.’

14Ka onongo Yubu obedo kacero lok ki an,

kono onongo pe agamo doge ki kit lok macalo mewuni.

15Doggi otwo woko, pe dong gitwero gamo dogi Yubu,

pien pe gitye ki lok mo ma myero guwaci.

16Itamoni an myero kong akurgi kun gin dong pe gitwero lok,

ma gin ducu dong gucung acunga, ma pe gitwero gamo lok mo?

17An ki tung bota abigamo;

dok abinyutu tama bene.

18Pien atye ki lwak lok mapol, cwinya tye karuya ni aloki.

19Nen, cwinya tye macalo kongo bwino ma kiumu wiye woko,

calo kicaa kongo bwino manyen ma mito yec.

20Myero aloki, wek aywe maber;

myero olo to angam doga, agam loke.

21Pe abicwako kor dano mo,

pe abidworo kor dano mo bene.

22An pe angeyo kit me dworo kor dano;

ka awaco ni atem, ci Lacwec myero otugi neka woko cut.