Yubu 31

1Atyeko kwongo kwong wa con, wan ki wanga;

ni pe dong abineno nyako mo ki wang me miti.

2Gin ango ma Lubanga matye malo timo bota?

Won Twer Ducu matye i polo miya gin ango me ginaleyana?

3Onongo yam atamoni can poto ikom lubalo aye,

dok ni keckom mako lutim maracu keken.

4I ada Lubanga neno kit kwona ducu;

dok kwano wel tyena ma akalo ducu.

5Ka yam abedo kaloko lok goba,

ka yam koma obedo mit kabumu dano;

6ci wek Lubanga opima ki mijan ma pimo kakare,

ka wek Lubanga onge ni cwinya leng.

7Ka yam tyena ongak woko ki i yo pa Lubanga,

ka yam cwinya oparo pi gin ma aneno,

ka yam ton me bal mo onen i cinga;

8ci wek jo mukene aye gucam gin ma an acoyo,

gin ma ocek i potona myero guput woko.

9Ka cwinya yam otera ikom dako mo,

ci akane inget dogola pa lawota,

10ci wek dakona oreg bel pi laco mukene,

wek ngat mukene aye obut kwede.

11Kono meno onongo obedo bal marac atika;

ma lungolkop myero gungola pwod pire.

12Ci tim kwelena omyero obed mac ma wanga nakanaka nio wa i bur lyel,

ma wango wa lwit cam ki i potona woko ducu.

13Ka onongo tye ada ni ceng akwero pido pa opiina nyo angecana,

ikare ma gukelo cwercwinygi ikoma,

14ci abitimo gin ango ka Lubanga ocung pi ngolo kop ikoma?

Ka en obino pi penyo loke ci abigamo doge ningning?

15Pe ngat ma ocweya i maa en aye ma ocweyo opiina bene?

Pe ngat acel aye ma ocweyowa ki i ic?

16Yam pe atwono lucan ki gin mo ma gimito,

pe bene amiyo mon to gukuru kony ki bota kwe.

17Ceng pe acamo cama kena,

dok pe atwono latin kic mo cam,

18pien nia wa iwang tinona abedo kagwoko lutino kic calo an awon gi,

dok nicake ki i maa an abedo kakonyo mon to.

19Ka ceng abedo kaneno anena ngat mo ma mito to pi can bongo,

nyo dano ma lacan obedo labongo gium, ma pe akonye,

20ka ceng pe olegga gum,

pien pe amiye bongo me yer romo mapek pi miye lyeto;

21ka yam atingo cinga pi goyo latin kic mo,

pien angeyo ni kitwero konya wek alo kop;

22ka yam atimo kitmeno ci myero akwaya bada oput woko ki iwi gwoka,

ci myero kiput bada ki iwang mwote woko.

23Pien yam onongo alworo can ma a ki bot Lubanga;

pe atimo meno ducu, pi woro dite ki deyone.

24Ka yam amoko gena ikom lonyo,

nyo ajenge ikom lonyo me jabuna;

25ka ceng cwinya obedo yom pi lonyona mabup,

nyo pien acoko gipiny mapol;

26ka yam aneno ceng ka ryeny,

nyo dwe kun woto ki deyo madit,

27ma dok aweko kibita me worogi i mung,

kun akulu wiya piny pi worogi.

28Meno bene kono onongo obedo bal ma lungolkop myero gungola pwod iye,

pien nongo adoko lagoba bot Lubanga matye malo.

29Yam pe abedo ki yomcwiny ka keckom omako lakwora,

pe anyate ka gin marac opoto ikome.

30Yam pe aweko doga obalo bal,

kun alego pi tone.

31Jo ma i oda yam guwaco ni,

‘Anga ma pe oyeng ki ringo lee ma laditwa oneko?’

32Larok mo pe yam obutu i dye gang ata,

pien yam ajolo luwot ducu i oda.

33Yam pe amungu gin marac ma atimo calo jo mukene,

kun akano bala i cwinya kena,

34pi lworo lok pa lwak.

Yam pe aling mot kun pe akato woko ki i oda,

pi lworo cac pa jo me dogola mukene.

35Kono nene ngat ma winyo loka tye!

Nen, dong akwonge ni lok ma alokoni kakare!

Wek Won Twer Ducu ogam loka.

36Kono lakwora ocoyo lok ma odota kwede acoya,

kono anyate kwede ma nongo atingo iwi gwoka,

nyo adwalo iwiya macalo lalukana.

37Kono atite gin ducu kikore,

kun anyiko cok kwede calo abedo laker.

38Ka yam lobo ma apuru okok ikoma,

ma kokone winye ikor kweri pa lapur;

39ka yam acamo cam ma ocek labongo culu wange,

kun aweko wegine guto ki kec;

40ci wek i potona okutu odong iye ma ka ngano ki cayiri,

ki doo ma ngwece coo ma ka cayiri.”

Lok ma Yubu oloko ogik kany.