Yubu 30

1Yubu omede ki lok kun waco ni, “Ento kombedi dong kitye kanyera,

jo ma pud lutino ki tung bota,

ma wegigi yam acayogi,

ma onongo pe atwero ketogi wa ikin gwogi ma gikuru romina.

2Kit kony ango ma onongo atwero nongo ki ikom teko me badgi,

gin jo ma kero komgi dong otum wokoni?

3Jo ma lucan ma kec nekogi,

gin nyamo lwit yen i tim kama dano peke iye.

4Gingwedo pot yat me tim ki oboke me bunga,

ki giboko lwit lyono me acamagi.

5Yam kiryemogi woko ki ikin dano;

kidange ikorgi macalo kidange ikor lakwo.

6Yam gibedo i ora kulu kama rac,

ki i bur ma i ngom nyo i boro got.

7Yam gikok ki i bunga macalo lee tim,

gigure kacel ite okutu.

8Gin jo ma kitgi racu ma pe kimarogi;

ma kiryemogi woko ki i lobowa.

9Ento kombedi dong gucako wer ikoma,

nyinga odoko lok aboka ki tung botgi.

10Gidaga, ma gibedo kweda anyeda,

gingulu laa wa iwanga.

11Pien Lubanga obalo tekona woko,

oweko gumuke ikoma ki kerogi ducu.

12Lwakgi otware ikoma ki tung acuc,

ci gucako ryema woko cut,

kun giyenyo yo me kelo can ikoma.

13Gubalo yoo ma kono aringo alare kwede,

gimedo can ikoma ameda;

kun ngat ma jukugi peke.

14Gumuku wang cel malac, ci gukati ikoma,

gibedo ni kelkel iwi obur.

15Lworo obango koma woko;

deyona otum woko macalo gin ma yamo okolo,

gum ducu ma anongo bene orwenyo woko macalo pol.

16Kombedi dong acok to woko;

agiki me arem ma ikoma peke.

17Cogo koma mwode amwoda i dyewor,

awinyo arem ma pe aywe.

18Lubanga omako ngut ginarukana ki tek,

ci odeya woko ki ngut kanyina.

19Obola woko piny i daba,

adoko calo apwa ki buru.

20Lubanga, abedo kakok boti, ci pe igamo doga;

acung kalega ento pe iketo cwinyi iye.

21Dong iloke idoko ger woko ikoma,

itye kauna ki teki ducu.

22Imiyo yamo tinga malo,

yamo kot ma mor mager tye kabola atata.

23Eyo, angeyo ni ibitera i to,

kama jo makwo ducu o iye.

24Pingo ilwenyo ki ngat ma piny oloyo,

ma pe twero timo gin mo ma pat ki tango cinge me kwayo kica?

25Nene pe akok pi jo matye i peko?

Cwinya bene pe ocwer pi jo ma piny obwoyogi?

26Ento ka nene abedo kageno ni abibedo maber,

ci nen gin marac aye ocako bino;

ikare ma ageno ni piny bibedo leng, colpiny aye obino.

27Cwinya obedo kapoto, ci pe omedo ki kwe;

kare me aroma keken aye dong tye inyima.

28Awire ma cwinya otur,

ento ngat mo ma kweyo cwinya peke; aa malo i kacoke akok pi kony.

29Too gudoko omegina,

ki udu bene gudoko luwota.

30Del koma ocido woko,

ci ware woko awara ki ikoma,

cogona tye ka wange awanga.

31Dwon opuka dong odoko wer me kumu,

ki dwon nyamulerena winye calo dwon dano ma kok.