Yubu 29

Lok ma Yubu dok ogamo

1Yubu dok omede ki loke kun waco ni,

2“Aya do, kono ceng atye kit ma abedo kwede ikare macon ca,

ma Lubanga obedo kagwoka!

3Ikare meno tarane obedo kalyel malo ka wiya,

dero pa Lubanga obedo kamenya ka awoto i piny macol.

4Ikare meno onongo lima tye kamede ameda,

ki mar pa Lubanga bene ogwoko ganga.

5Won Twer Ducu onongo tye kweda,

onongo lutinona bene gurumu kangeta woko.

6Kama acito iye ducu onongo anongo cak mabup,

onongo anongo moo madwong wa ikom yadi ma apito ikin gweng!

7Ka yam acito i dog gang kama ludongo gicoke iye,

ci onongo ayubu kabedona i dye gang kama kiporo iye lok,

8ka yam awobe gunena ci onongo gidire woko cen,

ludongo onongo gia malo gicung acunga;

9rwodi bene onongo gijuku lokgi woko,

kun giketo cinggi idoggi;

10dwon ludito onongo ling woko,

wek giwiny lok ma a ki idoga.

11Dano ma onena onyo owinyo lok koma,

nongo tye ki caden me gin maber ma atimo.

12Pien onongo akonyo lucan ka gukok,

dok akonyo lutino kic ma lukonygi peke.

13Jo ma onongo gitye ki can gilegga gum,

dok amiyo mon to bene gunongo yomcwiny.

14Onongo aruke ki kit ma atir macalo ruka me kare ducu,

onongo anyebe ki ngolo kop kakare macalo jor ki tok wic ma aruku.

15Yam onongo abedo macalo wang lutowang,

ki tyen lungolo.

16Yam bene onongo akonyo lucan macalo gin lutinona kikome;

kadi dano ma onongo pe angeyo, yam acung pire i pidone.

17Onongo alwenyo matek ki lubwami macalo alwenyo ki nguu,

dok alaro dano ki botgi macalo alaro ki i dog labwor.

18Yam onongo atamo ni abito ki kuc i pacona,

ki bene onongo atamo ni abirii iwi lobo,

19ma nongo arom ki yat ma lwite ojar inget pii,

ma toyo luk i jange dyewor benebene,

20kun deyona pe rweny ki bota,

dok tekona roc doko nyen kare ki kare.

21Dano yam winyo tama ci giling mot;

kun gikuru tam ma an aye amiyo botgi.

22Onongo ka dong aloko, pe dok kiloko lok mo,

loka onongo obedo macalo kot ma cwer.

23Onongo gibedo kakuru loka macalo kikuru poto kot,

onongo kigamo tama macalo lapur jolo kot me cwir.

24Onongo abunyu botgi kadi gipeke ki gen mo;

ci bunyuna onongo miyo ki gin yomcwiny.

25Yam anyutigi gin ma myero gutim, kun abedo macalo rwotgi,

nyo macalo rwot ma bedo i dye monye,

ki ngat ma kweyo cwiny jo matye kakumu.”