Yubu 28

Pak pi ryeko

1“Bur tye kama kikwinyo iye ryal,

ki kabedo kama kiliyo iye jabu bene tye.

2Nyonyo kikwinyo ki i ngom,

mola kinongo ki i gweng ka kilenyo.

3Dano gimenyo mac tara ite ngom,

kun giyenyo gweng nyonyo nio wa i agikine

i mutu ki piny macol licuc.

4Gikwinyo bur i nota kama dano pe bedo iye;

ki kama luwot i yoo bene pe gio iye.

Kilutugi ki tol ci gilyere iye kama dano mukene peke iye.

5Ki malo iwi lobo cam cek,

ento ki piny ite lobo acelu

mac buke iye ci muku gwenge ngenyo woko.

6Ikin gwenge tye iye godi matino ma bulu me wel,

matye iye luru jabu.

7Yoo ma cito kunu acut mo pe ma ngeyo,

ocecu bene peya oneno.

8Lee tim ma lunyata peya gunyono kunu;

labwor bene peya owok ki iye.

9Dano keto cinge itic ikom pata matek,

ci muku wa got madit ki itere piny.

10En baro yoo pii ikin gweng,

ci nongo gin me wel.

11Gigolo wa kama pii kati ki iye;

ci gikelo kamaleng gin ma okane.

12Ento ryeko kibinongo ki kwene?

Niang matut kabedone tye kwene?

13Dano pe ngeyo yoo ma cito iye,

ryeko bene pe nonge i lobo pa jo makwo.

14Kut me nam madito giwaco ni, ‘Pe tye i iwa,’

nam matino bene giwaco ni, ‘Peke botwa.’

15Jabu ki ryal pe twero wilone,

pe tye wel lim mo ma kiromo culu pire.

16Pe kitwero poro wele ki jabu me Opir,

onyo kidi me wel macalo onik nyo capir.

17Jabu ki madara pe rom kwede,

pe kibilokone kadi wa ki atego me jabu maber.

18Pe kibiporo ki tiko me wel ma kware nyo ma tare;

wel ryeko tye lamal kato wel jami mukene me wel woko ducu.

19Kidi ma obedo atworo me Etiopia pe kitwero porone kwede,

wa jabu ma kiliyo maber bene pe romo wilone.

20Ci dong ryeko kono a ki kwene?

Niang matut bedo kwene?

21Okane woko ki iwang gin makwo ducu,

oume woko ki bot winyo me polo.

22Lyel ki to giwaco ni,

‘Lok ikom ryeko wan wawinyo awinya keken.’

23Lubanga kene aye ngeyo yone,

en ngeyo kama ryeko nonge iye.

24Pien Lubanga neno wa i agiki me lobo,

neno wa jami ducu matye ite polo.

25Ikare ma en omoko kit ma teko pa yamo myero obed kwede,

kun omoko bene kama pii me nam myero ogik iye;

26ikare ma en omoko kwene kama kot myero ocwer iye,

dok ocimo yoo ma lutkot myero olubi;

27ikare meno Lubanga oneno ryeko, ongiyo maber,

omiyo ocung ci otato tere. 281

Ci owaco bot dano ni,

‘Nen, lworo Rwot en aye ryeko;

bwoto timo gin marac aye kelo niang matut.’”