Yubu 27

Yubu pud moko ni kite atir

1Yubu dok omede ki loke kun waco ni,

2“Akwongo ki nying Lubanga makwo ma okwanyo twerona woko,

en Lubanga Won Twer Ducu ma omiyo cwinya odoko kec ni,

3pi kare ducu ma pud atye ki kwo,

ma yweyo pa Lubanga pud tye i uma,

4doga pe biloko goba,

ki leba bene pe biloko lok me bwolo dano.

5Pe abiye lokwu matwal ni gin ma wuloko tye kakare;

nio wang ma ato, ento pud abiwaco ni cwinya leng.

6Pud abicung matek kun awaco ni kita tye atir, pe abiloke;

angeyo ki i cwinya kena ni pe tye nino mo i kwona ducu ma lewic myero omaka iye.

7Wek lukwora gunen can macalo jo maracu!

Wek jo ma gimito lweny kweda kitimgi macalo lubalo!

8Dano ma pe lworo Lubanga tye ki gen ango ka kwone otum woko,

ka Lubanga dong okwanyo kwone woko?

9Itamoni Lubanga biwinyo kokone ka ayela mo obino ikome?

10Itamoni cwinye bibedo yom ikom Won Twer Ducu?

Dok itamoni bilego Lubanga kare ducu?

11Wek kong apwonywu ki lok ma dok ikom twer pa Lubanga,

pe aumu kit tam ma Won Twer Ducu tye kwede.

12Ka wun ducu dong wutyeko neno pirwu kenwu;

ci pingo dok wuloko lok ma konye peke?”

Lagam pa Jopar

13Jopar ogamo ni, “Man can ma Lubanga poko bot dano marac,

man gin ma jo ma giunu jo mukene ginongo ki bot Won Twer Ducu.

14Ka lutino pa dano marac gunya,

kinekogi woko ki pala lucwan;

lutino ma en onywalo pe gibedo ki cam ma romogi.

15Lutinone ma pud gikwo two gemo aye nekogi,

ci mon gi pe bikokogi.

16Kadi bed odur lim ma odure calo kweyo,

ki ocoko bongi obako lipim,

17en twero cokone mere, ento dano ma kite atir aye ma birukugi,

dano ma peke ki bal aye ma bipoko lime.

18Ot ma en ogero bibedo calo obwo oboropyen,

nyo ot aduc ma kiyubu pi kuru cam matye i poto.

19Ceng mo en bibutu piny ma nongo pud olony,

ento ka oyabo wange odiko ci nongo gin mo dong peke.

20Gin makelo lworo bimwonye woko macalo pii lalele;

yamo lapiru bitinge woko i cwiny dyewor.

21Yamo ma a kunyango bitinge woko tere matwal;

kun kwanye woko ki i kabedone.

22Yamo bicore ikome labongo kica,

ma nongo en ringo ki teke ducu wek ebwot woko ki iye.

23Yamo bikodo cur mager ikore,

ma ngur calo lapiru.”