Yubu 26

Lagam pa Yubu bot Bildad

1Yubu dok ogamo ni,

2“Kit ma ikonya kwede dit adada!

An dano ma agoro dok apeke ki tek mo!

3Kit ma ikonyo kwede ngat ma pe ki ryeko ki tam,

kun itito bote lok me ngec maber mapol!

4Anga ma okonyi oweko iwaco lok meno?

Cwiny ma itye kalok kwedeni ilimo ki bot anga?”

Bildad

5“Tipu pa jo ma oto ma gitye piny komgi myel,

ki i pii matye ite lobo.

6Lyel tye munero ki inyim Lubanga,

lobo pa jo ma oto peke bene ki giumu wiye.

7Lubanga oyaro but polo tung kumalo kama tye nono,

pe ocibo lobo ikom gin mo.

8Lubanga pongo pol ki pii malo i polo,

ci pol pe tyer poke woko pi pek pa pii.

9En umu wang dwe,

kun yaro pole umu woko.

10En olungu lawala iwi pii me poko wangco,

me poko dero ki mutu.

11Ka ocoko wir ma gutingo polo,

ci giyenge dok gibedo ki lworo.

12Nam oling pi twerone,

ogoyo min kulu Rakab pi ryekone.

13Yamone omiyo polo oware onen maleng;

en aye ocobo twol matye kamol ringo woko.

14Nen, man pud doge, pe kom tice kikome,

wawinyo macalo lok ma kikwilo akwila ma winyone tek,

ento anga ma niang ikom twerone ka mor calo mor kot.”