Icaya 55:8

Mot me nono me kica pa Lubanga

1Rwot owaco ni, 1“Wubin wutwom pii,

wun jo ducu ma orwo nekowu;

ngat ma lime mo peke,

myero bene obin owil cam.

Wubin wuwil kongo bwino ki cak labongo lim, labongo wel mo.

2Pingo wubalo limwu ikom gin ma pe kwon,

pingo kono wutyeko tekowu woko ka nongo gin ma pe yengowu?

Wucik itwu atika iloka, ci wucam cam maber,

dok wubed ki yomcwiny pi cam mabeco ma amiyowu. 32

Wucik itwu wuwiny loka, ci wubin bota;

wuwiny loka, wek wubed kwo;

ci abicike kwedwu i gicike ma rii nakanaka,

abimiyowu mar mera ma pe loke, ma gene, mayam aciko bot Daudi.

4Nen, yam aketo en obedo caden bot lurok,

latel ki lamii cik bot lurok.

5Nen, wun wubilwongo rok mapatpat ma pe wungeyogi,

ki rok mapol mapatpat mayam pe gingeyowu gibiringo gibino botwu!

An Rwot Lubangawu,

Ngat Maleng me Icrael,

abiweko magi ducu time

abiketo deyo i komwu.

6Wuyeny Rwot ikare ma en pud twero nonge,

wukok bot Rwot ma pud en tye cok.

7Latim marac myero obwot time maraci woko,

ki dano ma pe kite atir bene owek tame ma pe beri woko;

oloke odwog cen bot Rwot, wek Rwot otime kica,

myero odwog cen bot Lubangawa, pien en biweko bale woko ducu.”

8Rwot waco kuman ni,

“Pien tama pe obedo tamwu,

ki yowu bene pe obedo yona.

9Kit macalo polo tye malo kamabor makato loboni,

yona bene tye malo kitmeno makato yowu,

ki tama bene tye malo kato tamwu woko. 103

Kit macalo kot ki pee core bino piny kun gia ki i polo,

ma pe dok gidok malo kunu, ento gikweyo lobo,

miyo ginapita twi ci dongo,

miyo kodi bot lacokodi ki miyo kwon bene bot dano me acama,

11lok ma a ki idoga bene bibedo kitmeno;

pe bidwogo bota nono ma nongo pe otiyo gin mo,

loka bitiyo gin ma amito ni otii, dok bicobo gin ma acwale pire.

12Pien wubikato woko wuweko Babilon kun wucito ki yomcwiny,

kibiterowu ki kuc;

godi ducu ki cere ducu ma inyimwu gibimwoc ki wer licur,

ki yadi ducu me tim biyenge ki yomcwiny.

13Yat ciprec bitwii maka okutu;

ki yadi ma ngwecgi kur bitwii maka ocok.

Meno bibedo gin me nipo ma bedo nakanaka, ma pe birwenyo,

me nyutu ni an Rwot aye ma ceng atiyo man.”