Icaya 40:8

Lok ma kelo gen bot jo pa Lubanga

1Lubangawa tye kawaco kuman ni,

“Wukwe cwiny lwaka, wukwe cwinygi!

2Wucuk cwiny jo Jerucalem,

wuwac botgi ni, karegi me bedo opii dong ogik woko,

dong kityeko timo kica botgi ikom balgi ducu.

Can ma an aketo ikomgi obedo dit mada,

obamo balgi ducu ma gutimo.” 312

Dwon mo ma dange i tim winye kun waco ni,

“Wuger yoo pa Rwot,

wutir yoone ocung atir i tim aroo pi Lubangawa.

4Lung ducu kibitoro woko,

godi ki cere ducu kibidwokogi woko piny,

kama ogone kibitiro cung atir, dok kama obedo burbur kibipiro woko.

5Kadong deyo pa Rwot binen kamaleng,

ci dano ducu bineno kacel,

pien Rwot kikome aye ma dong owaco.” 63

Dano mo tye ka waco ni, “Dange!”

Cutcut agamo ni, “Imito adange ningning?”

Ci dwon meno ogamo ni, “Tit ni gin mo ducu matye ki kom obedo calo lum,

bere ducu rom ki ber pa ature me tim.

7Lum ner, ature bene o woko ka Rwot okutu kome ki aluu me yweyone.

Ada, dano mere rom ki lum.

8Lum ner, ci aturene o woko,

ento lok pa Lubanga bedo matwal.

9In Cion ma ikelo lok maberi,

it malo iwi got mabor.

In Jerucalem ma itito lok maberi,

med dwoni malo ki tek,

med dwoni malo, pe ilwor.

Wac bot jo ma bedo i taun madito ducu me Juda ni,

‘Wunen Lubangawu tye kabino!’ 104

Wunen, Rwot Lubangawu tye kabino kaloc ki tek mere,

nen, en tye kabino ki mote,

jo ma en okoko bene tye inyime. 115

En bikwayo romine calo lakwat,

bitingo lutino romine i bade,

en bitingogi i kore,

ci mako lutino romi ma dot, peyogi motmot.”

Pe kitwero poro Lubanga pa jo Icrael ki gin mo

12Anga mayam kong opimo pii idye cinge,

dok ma opimo polo ki cinge?

Anga ma ojobo apwa me lobo ci oonyo i gipimo jami,

nyo mayam opimo godi i mijan,

ki kama obedo cerecere i ratili? 136

Anga ma waco ki Rwot gin ma myero en otim,

nyo anga ma pwonyo Rwot dok miye tam,

macalo lapwonye?

14Anga mayam kong Rwot onongo tam ki bote,

nyo anga ma opwonye ki ngolo kop atir?

Anga mayam kong opwonye me medo ngece,

nyo ma onyute yo me bedo ki niang matut?

15Nen rok ducu rom ki pii ma ton kicel ki i agulu,

dok giyot macalo apwa matye i mijan;

nen, en tingo cula woko ki idye nam calo nyig kweyo.

16Yen ducu ma i bunga me Lebanon pe romo wango gitum awanga,

lee matye iye bene nok, pe giromo me atyera bot Lubanga.

17Rok ducu pe gin mo inyime,

gin ducu pe gubedo gin mo ki tung bote, gin ducu mwa. 187

Dong ibiporo Lubanga ki anga,

nyo itwero poro cale ki kit cal ango?

19Lubanga pe rom ki cal jok ma kitwako atwaka, ma latet twero twakone,

layub jabu mwono kome woko ki jabu,

dok tiyo nyor ryal pire.

20Ngat ma can odiyo adada, yero yat matek ma pe top atata me gityer,

ci yenyo lapac ma ladiro, wek opane cal apaya,

ma pe dok romo poto ki kama kiketo iye.

21Pe wungeyo bo? Yam peya wuwinyo?

Yam onongo pe kitito botwu pire con?

Peya wuniang nia wa i acaki me cweyo lobo?

22Ngat ma bedo iwi komkere malo en aye ma oketo,

en ma bedo wa malo tutwal wa inge pol,

jo ma bedo piny i lobo ginen matino calo ocene.

En ryeyo polo calo bongo kicika,

dok yaro bene calo kema me bedo iye.

23En miyo luloc me lobo gidoko gin ma konygi peke,

en dwoko rwodi ducu me lobo woko piny lirwat.

24Gin gubedo calo ginapita ma pud kipito apita,

ma pud kicoyo acoya kun guryeyo lwitgi pud aryeya i ngom,

ma ka Rwot ocwalo yamo ikomgi ci giner woko;

kace yamo lapiru okodo ikomgi, ci tingogi calo cung kal terogi woko.

25Ngat Maleng openyo ni, “Dong wubipora ki ango mono,

tye ngat mo marom kweda?”

26Kong wuting wangwu malo wunen polo,

anga ma ocweyo lakalatwe magi ducu?

En aye obedo ngat ma telo monygi, ma ngeyo welgi ducu,

dok bene lwongogi ki nyinggi!

Tekone dwong tutwal,

meno aye gin ma omiyo ngat acel mo ki ikin gi pe rwenyo.

27Pingo itye kakoko, in Yakobo?

Pingo kono itye kawaco ni Rwot pe neni, in Icrael,

kun iwaco ni Lubanga tika paro piri?

28Pud pe wungeyo bo? Yam peya wuwinyo?

Rwot en Lubanga ma bedo nakanaka,

en aye ma ocweyo wi lobo ducu.

En pe ol, pe bene doko goro;

ngece tut ma pe wace, kadi tato tere bene pe twere wa ki acel.

29En miyo tek bot jo magoro,

dok bene medo tek bot ngat ma tekone odok woko piny.

30Kadi awobe bene gitwero doko goro,

gitwero ol bene ma giromo poto woko piny;

31ento jo ma giketo gen gi ikom Rwot,

teko bidwogo cen ikomgi.

Gibituk gicito malo calo ocur,

gibiringo ma pe giol,

gibibedo kawot nakanaka ma komgi pe biloc.