Kocea 8

Rwot ojuku jo Icrael pi woro cal jogi

1Rwot waco kuman ni, “Wukut tum! Pien lumerok gitye kabino macalo acut kamonyo lobona; jona dong guturu gicikena, dok bene gukalo wi cika woko. 2Kadi bed jo Icrael gikok bota kun giwaco ni, ‘In Lubangawa, wan wangeyi,’ 3ento gin dong gubolo gin maber woko, omiyo lumerok dong biryemo korgi.

4Jona guketo lukergi labongo twerona, guketo lulocgi labongo ngeca. Gutiyo cal jogigi ki ryal ki jabugi; gin gigi gutiyo gin ma neko gin kikomgi. 5Akemo omaka ikomwu pi cal latin twon ma wuworoni, wun jo Camaria. Kinigana otede ikomwu calo mac. Jo Icrael bitero kare marom mene ka, ka dong gibibwoto woro cal jogi? 6Latin twon ma wuworo i Camaria, ladiro tic aye ma otiyo ki cinge! Pe obedo Lubanga kikome! Pimeno kibingidone woko matinotino! 7Pien gin me mingo ma Icrael gitiyo obedo calo coyo yamo, ento gin ma gibikayo ki iye bibedo calo lapiru. Ngano ma i poto ma pe ongok, moko mo bene pe bia iye. Ento kadi ka mogo ocek, ci lurok aye biyako woko ducu. 8Icrael dong odoko calo rok ata mogo; gin dong gudoko calo agulu ma oto, ma konye peke liweng. 9Icrael obedo calo kana me tim ma woto kene kun yenyo twon; en ocito wa i Aciria kayenyo kony dok bene oculu lim bot rok mukene wek gugwoke. 10Kadi bed gucate ken gi ikin lurok, ento abidwokogi woko oyotoyot. Ci gibineno can malit ite loc pa rwot madit me Aciria.

11Jo Icrael gunyayo lwak keno tyer mapol pi tiyo iye lakwany balgi, ento keno tyergi mapoli odoko kama gitiyo iye bal mapol ata. 12Kadi kono acoo cika mapol ata botgi, ento gin pud gikwerogi woko macalo gin ma welo ki botgi. 13Gimaro gitum; gin gitumu lee pi camo ringone; ento cwinya pe yom ikomgi. Ikare man abipo pi timgi maracuni, ci abiketo can ikomgi pi bal meggi; dong gibidok cen wa i Ejipt.

14Pien Icrael wiye dong owil woko ikom ngat ma ocweyo en, ci ocako gero gangkal madongo; Juda ogero taun madito mapol ma kirumugi ki cel gogo; ento abicwalo mac ikom taun gi madito, ci biwangogi woko ducu.”