Kocea 7

1Ikare ducu ma amito dwoko gum bot jona, ki ikare ma amito cango iye Icrael, ci balgi otugi nen woko cut, ki tim maracu ma jo Camaria gutimo; pien gitimo bwami, lakwo turu ot, kun luyak giyako dano ki i gudu. 2Ento gin pe giparo ni an apo ikom gin maracu ducu ma gitiyoni. Koni timgi dong orumugi woko dyere, dong timgi tye inyima.”

Yub me roro i gang ker pa rwot

3Rwot waco kuman ni, “Dano giyomo cwiny rwot ki timgi maracuni, kun bene giyomo cwiny lukergi ki bwolagi. 4Gin ducu lutim abor; girom ki keno malyeto lodimac otwak iye, ki ma lated mugati pe dok cwako iye mac, nia ikare ma en orubu iye tobi ki moko nio ka oyenyo, ma mugatine dong ocako kwot. 5Inino me karama pa rwotwa ma en oyubu, luloce ducu gucako mero ki kongo bwino ma gumatoni; ci rwot ocako ribe kacel kwedgi i timgi me mingomingo. 6Pien cwinygi obedo kalyeti pi lok ma gubedo kapiro ikom rwotgi. Kinigagi okur calo mac dyewor benebene, ci ki odiko ocako lyel calo mac arum ikom rwotgi.

7Gin ducu gudoko lyet macalo keno, guneko lulocgi woko ducu. Lukergi ducu guto woko, pe tye ngat mo ikin gi ma kok bota pi kony.”

Icrael ki Rok mukene

8Rwot waco kuman ni, “Jo Icrael gurube woko ikin lurok; gubedo calo mugati capat ma pe ocek maber. 9Gin bene gipeke ki ngec ni ribe ki rok mukeneni dong otyeko tekogi woko; ninogi dong odong manok mo keken, ento gin pe gingeyo. 10Wake pa Icrael odoko caden ikome; ento pe gudwogo bot an Rwot Lubangagi, kadi bed gineno can, ento pe guyenyo an ma Lubangagini. 11Icrael ming rom ki amam ma wiye bene pe tiyo; gikok mere bot Ejipt, dok gicito mere wa i Aciria kayenyo kony. 12Ento abiciko obwona i yo ma gicito iye ducu, ci abiretogi woko piny macalo winyo ma tuk malo, abipwodogi pi timgi maracuni.

13Gibineno can, pien gungak guweka woko! Ci kibityekogi woko, pien gujemo ikoma! Onongo amito larogi, ento giloko lok goba ikoma. 14Pe gikok bota ki cwinygi ducu, ento gibedo kacur acura ki iwi kitandagi; gingolo komgi1 keken gi ki pala kun gibako doggi bot lubanga pa lurok pi ngano ki kongo bwino, kun nongo gijemo kwede ikoma. 15Kadi bed yam apwonyogi kun amiyo gudoko jo matek, ento gin pud gidok kayubu lok marac ikoma. 16Giloke gidok bot jok Baal; girom ki atum ma ogom ma pe kitwero bayone cito atir. Rwodigi bito ki pala lucwan, pi ngala ma i doggi. Man bimiyo kicayogi wa i lobo Ejipt.”