Kocea 6

Ngut me goba

1Jo Icrael giwaco ni, “Wubin wek wadok wunu cen bot Rwot; pien en okilo komwa woko; wek en aye ocangwa; en otyeko pwodowa matek, dok bitweyo wang retwa. 2Ka nino okato aryo, en bicerowa woko, inino me adeke bimiyowa kwo, wek dok wabed ma komwa yot inyime. 3Weku dong wangeyu Rwot, wacuku cwinywa kangeyo en; en bidwogo ada macalo rupiny; en bibino botwa macalo kot omaa moyo, calo kot me cwir ma bido lobo.”

4Ento Rwot waco kuman ni, “In Icrael abitimi ningning? Abitimi ningning in Juda? Mar mewu rom ki pol ma umu piny odiko, dok bene rom ki toyo ma two woko oyot. 5En ma omiyo acwalo lunebi botwu ki kwena me ngolo kop ki me tyekowu woko. Dong gin ma an amito ki botwu tye atyer kamaleng: 61An cwinya mito mar ma pe loke, pe amito lee me gitum. Ngeyo Lubanga ber; kato gitum awanga ma wutyero botani.

7Ento gin gukalo wi gicikena i Adam, ci gutiyo gin ma pe atir ikoma ki kunu. 8Gilead aye taun pa lutim aranyi, ma opong ki lunek. 9Macalo luyak gikiyo dano, ajwaki bene gicoke kacel kumeno; gineko dano i yoo ma cito i Cekem, kun gitimo gin marac tutwal. 10Aneno gin mo marac ma okato kare woko i Ot pa Lubanga pa Icrael. Tim kwele pa Icrael tye i lobo kunu, ki jona bene dong gubale woko pi woro cal jogi.

11In Juda bene dong atyeko yubu kare me pwodwu woko. Kadi bed ni amito mada me dwoko gum pa jona wek gubed maber i lobogi.