Kocea 5

1Rwot waco kuman ni, “Wuwiny lok man, wun ajwaki pa Lubanga, wuket cwinywu, wun ot pa Icrael. Wucik itwu, wun ot pa rwot. Pien kop ma kingolo otiko komwu; pien wun wubedo owic i Mijpa, ki obwo ma kiciko iwi got Tabor. 2Wun wubedo calo bur ma kikwinyo matut i Citim,1 ento abiketo can ikomwu ducu. 3Angeyo anga ma in ibedo, Icrael in pe itwero kane ki bota. Wun jo Icrael kombedi wudoko lutim kwele, dok bene dong wubale woko gire ma pe wupore me woro an.”

Kocea ojuku lwak pi woro cal jogi

4Tim maracu ma gimaroni gengogi woko me dwogo bot Lubanga; pien cwinygi dong tye me woro lubanga mukenegu, omiyo pe dong gitwero ngeyo Rwot. 5Wake pa Icrael odoko caden matye inyima; Epraim bitwome pi bale; kadi Juda bene binywako twome kwedgi. 6Gibiwot ki romi ki dyangigi me gitum pi yenyo Rwot, ento pe gibinonge; pien Rwot dong otyeko a woko ki botgi. 7Gin gubwota woko, dok lutinogi bene gubedo lurok ata ki bota. Pimeno pe dong gibikwero Karamagi me Por Dwe pien dong abityekogi woko kacel ki camgi ducu matye i potigi.

Mony ikin Juda ki Icrael

8Wukut bila me oto mony i Gibea, wukut gwara me oto lweny i Rama. Wugo oduru me mony i Bet-aven2; wun jo pa Benjamin wurwayo cok i dog lweny! 9Icrael bidoko obur inino ma kibiketo can ikome. Anyutu lok me ada ma bitime ikin kaka ma i Icrael ducu.

10Rwot waco kuman ni, “Luker me Juda gubedo calo jo ma gikobo got ma poko wang lobo; guoto mony ikom lobo Icrael ci gumayo ngomgi woko, dong abicoro kinigana ikomgi macalo pii. 11Ngolo kop ma abiketo ikom Epraim dong bidiyo en matek dok ture woko, Icrael orwenyo ngom ma meggi ma en onongo tye kitwero iye. Pien en otyeko miine kalubu kor gin ma konye peke. 12Pieno abidoko calo nyenye ma nango kom Epraim, dok abityeko teko pa Juda woko calo tut ma camo wir ot ci tyeko tekone woko.

13Ikare ma Icrael oneno kit ma twone lit kwede, ki kit ma Juda bene oneno wang bure, omiyo Icrael owoto wa i Aciria, ci ocwalo kwena bot rwot madit. Ento en pe otwero cangowu, kadi wa bur mewu bene pe otwero cangone. 14Pieno abibedo macalo labwor bot Icrael, dok abibedo macalo latin labwor ikom ot pa Juda. An, an kikoma aye abikilo komwu woko, ka dong abiwoto gira; ikare ma abiywayowu aterowu cen, ngat ma bilarowu bibedo peke.

15Abidok gira i kabedona, nio wang ma guniang ikom balgi ci dong gicako yenyo an, gibiyenya ikare ma gitye i can, ka can dong ogudu komgi ci gibidwogo bota.”