Kocea 4

Kop ma Rwot okelo ikom Icrael

1Wuwiny lok pa Rwot, wun jo Icrael; pien Rwot tye ki kop ikom jo mabedo i lobo man; pien ada peke, mar peke, ki ngec mo ikom Lubanga bene peke i lobowu. 2Gin matye en aye kwong me goba, nek, kwalo kwo ki timo abor. 3Pimeno lobo tye kakumu, jo ducu ma gibedo iye gitye kadoko goro, ki lee tim bene, kacel ki winyo me polo; wa rec me nam bene bito woko.

Kop ma Rwot okelo ikom Ajwaki

4Rwot waco ni, “Ngat mo pe okel lok me da, dano mo pe odot lawote pien an atye ki kop ikom wun ajwaki aye. 5Kop ma angolo ikomwu en aye ni, wun kacel ki lunebi wubitwome dyeceng jwi, kit ma dano twome kwede dyewor, dok abityeko meni Icrael woko. 6Jona gitye ka to pi ngecgi manok. Pien wun wukwero pwonya ki bene bedo ki ngec, omiyo akwerowu ni pe wubed ajwakina. Wun wukwero lubu cik pa an Lubangawu woko, omiyo an bene abikwero ni lutinowu pe gubed ajwakina.

7Ka welwu omede mapol, ci wun bene wumede ki timo bal ikoma; man dong bimiyo abiloko deyowu doko me lewic. 8Wuloko bal pa jona odoko gin ma keliwu lonyo, omiyo wun wumito ni jona gumede kun gitimo bal. 9Abimiyowu pwod marom aroma ki pwod pa dano ata; ci abipwodowu pi kitwu, dok abiculuwu ma oporo timwu bene. 10Wubicam, ento pe wubiyeng; wubitimo tim kwele pi woro jok nywalgu, ento pe wubinya dok pe wubinongo nyodo; pien wuweko an Rwot Lubangawu woko kun wuloke dong kaworo lubanga mukenegu.”

Rwot ojuku jone pe me woro jogi

11Rwot waco kuman ni, “Kongo bwino makec ki kongo bwino malibone ki tim kwele tye karwenyo tam wi dano woko. 12Jona gicito kapenyo dog kac, odoogi aye ma nyutu botgi lok. Pien cwinygi me kwele onongo pyete omiyo gungak kaworo cal jogi calo dako ma malaya pi timo tim kwele, ma omiyo gungak woko kaworo lubangagu, omiyo guweko woro an Lubangagi kikome woko. 13Gitumu gitumgi malo iwi godi, giwango gitumgi iwi cere malo, ite kworo, atega ki olwedo, pien ni te tipugi ber.

Pimeno omiyo anyirawu gitimo tim kwele, ki anyira gerwu bene gitimo abor. 14Pe abiketo can ikom anyirawu ka gitimo tim kwele, kadi wa ikom anyira gerwu ka gitimo abor; pien co kikomgi bene gitye kanywako kit yo acelu ki lukwele, dok gitumu gitumgu kacel ki malaya me ot jogi. Kit ma carolok tito ni, ‘Rok ma pe giniang piny gibito woko.’

15Kadi bed wun jo Icrael, wuloke woko ki ikoma kun wudok i tim kwele me woro jogi, ci pe Juda odok labal acelu. In Juda, pe ilub kor jo ma gicito i Gilgal onyo i Bet-aven1 kaworo cal jogi. Gin gibwole ken gi kunu ka gikwongo ki nyinga ni, ‘Macalo Rwot tye ma kwo ni.’ 16Icrael bene lapele, calo roya ma lapele. An kono dok abitwero pitowu ningning macalo lakwat ma kwayo lutino romi i olet malac wek gucam? 17Woro cal jogi dong omiyo jo Icrael gubange woko, wek dong gucit i yogi ken gi gire. 18Gin lwak ma lumero, komgi mit katimo tim me kwele; gimaro lewic makato deyogi. 19Kibiterogi woko cen macalo gin ma yamo tero, ci lewic bimakogi pi gityergi bot lubanga atagu.”