Kocea 3

Kocea ki dako ma latim abor

1Rwot owaca ni, “Dok icit imar dako ma latim abor matye ki meye ma en mare kwede; macalo an Rwot amaro jo Icrael, kadi bed guloke gudok kaworo lubangagu kun gimaro tyero poki olok ma otwo bot jogi.1”

2Ka dong awile pi cekel apar wiye abic me ryal, ki cayiri maromo kilo miya acel ki pyere abic. 3Ci awace ni, “Myero ibed dakona, kun pe ibedo lakwele, dok pe bene ibut ki laco mo; kadi bed bitero kare malac ma an pe abibutu kwedi.” 4Pien jo Icrael birii pi kare malac labongo rwotgi mo nyo laker mo, labongo gitum nyo wir me aworagi, labongo cal lubanga mo ma myero gupeny doge.2 5Lacen jo Icrael dok biloke, gibicako yenyo Rwot Lubangagi, ki lakwar Daudi acel mo ma bibedo rwotgi; pimeno ber pa Rwot bimiyo gidwogo bote ki lworo ikare matye anyim kun gilimo mot mere.