Kocea 2

1Pimeno, wuwac bot ominwu ni, “Ammi1” ki bot laminwu ni, “Rukama2.”

Gomer pe lagen, jo Icrael pe lugen

2Wun lutinona, wupid ki minwu, wupide, kadi bed en pe dong dakona, ki an bene pe dong a cware. Wubak dogwu bote wek okwany ki i kwone tim kwele ki abor woko ki ikin tunune. 3Ka pe kumeno, ci abiwalo kome dong munero kit ma kinywale kwede; abiloke doko calo tim aroo, abimiye bedo calo lobo ma otwo, abineke woko ki orwo pii. 4Pe abitimo lutinone kica, pien gin lutino me kwele. 5Pien min gi obedo lakwele, pien oyac pi timo tim me lewic. Pien owaco ni, “Abilubu kor coga, ma gimiya gin acama ki pii ma akwo kwede, dok bene gimiya yer romo, pamba, moo Jeituni ki kongo bwino.” 6Pimeno abicelo yoone woko ki okutu, abigero cel arume kwede woko wek pe onong yoo wote. 7En biryemo kor coge, ento pe bimakogi i wangayo; en biyenyogi, ento pe binongo komgi. Lacen en biwaco ni, “Abiloke, adok bot cwara mukwongo ca, pien onongo abedo maber makato ma kombedi.”

8En yam pe ongeyo ni an aye ma amiye ngano, ki kongo bwino ki moo Jeituni, pe oniang ni an aye amiyo ryal onya bote, ki jabu ma gitiyo kwede bot jok Baal. 9Pimeno ka kare biromo, ci abitwone nganona, ki kongo bwinona, ci bene abikwanyo yer romona ki pambana, ma onongo oumu kikome matye muneroni. 10Koni dong abilunyu bongine woko ki ikome ci bidong munero inyim coge, ci ngat mo pe bilare ki i cinga. 11Abimiyo yomcwinye gik woko. Ninone madito, Por Dwe, ki Cabite, ki nino madito ducu mayam aciko pirgi. 12Abibalo oloke ki odurune, ma en loko ikomgi ni magi aye mot ma coge gumiye. Abilokogi gidoko bunga, ci lee tim bicamogi woko. 13Abiketo can ikome pi nino madito pa Baal, ma en wango iye odok eceta botgi, kun ruke maber ki agit ki tiko ngut me welgu, ka en lubu kwede kor coge, kun wiye wil woko ikoma, man lok pa Rwot kikome.

Mar pa Rwot ikom jone

14Pimeno nen, abibite mot, ci abitere woko wa i tim, kun aywayo tame ki lok mamit. 153Abimiye poto oloke ki kunu, abiloko Nota me Ayelayela doko dogola me gen. Ci en bidoka iye ki kunu kit mayam en oloko kwede ka tinone, marom ki lok ma oloko ma onongo a ki i lobo Ejipt. 16Inino meno, en bilwonga iye ni, “Cwara,” ci en pe dok bidok cen bot Baal. 17Pien abikwanyo nying Baal woko ki i doge matwal, pe dok kibilwongo nyingi.

18Dok inino meno abiketo gicike pirwu kun acike ki lee tim, kacel ki winyo me polo, ki gin ma lak alaka i ngom; dok abijuku atum, ki pala lucwan, kacel ki mony iwi lobo, wek amii wubut piny ki kuc.

19Ci abikwanyi in Icrael, abinyomi ibedo mera matwal;

abinyomi anyuti kit atir,

ki lengcwiny,

ki mar ma pe loke, kacel ki kica.

20Abinyomi ki gen ma pe loke ci dong idoko mera dok abigwoko cikena,

ci dok ibingeya ni an a Rwot.

21Inino meno abigamo lega pa jona jo Icrael,

“Abiciko polo me cwalo kot i lobo;

22ci lobo biceko ngano, kongo bwino,

ki moo Jeituni, i nota me Jejreel. 234

An kikoma aye abicoyo kodine piny i lobo.

Abitimo kica bot Lo-rukama5

ci abiwaco bot Lo-ammi6 ni, ‘Wun jona,’

ci gin biwaco ni, ‘In Lubangawa.’”