Kocea 1

11

Man lok pa Rwot mayam owaco bot Kocea, wod pa Beeri ikare pa Ujia, Yocam, Akaj ki Kejekia ma gin luker me Juda, ki ikare pa Jeroboam wod pa Yoaci rwot me Icrael.

Dako ki lutino pa Kocea

2Ikare ma Rwot okwongo lok ki i dog Kocea, Rwot owaco bot Kocea ni, “Cit wek inyom nyako ma lakwele, wek inywal kwede lutino me kwele, wek inyut ki jona kit ma gin pe lugen ikoma pien gitye katimo tim kwele pi kwero lubu Rwot.” 3Ci Kocea ocito onyomo Gomer nya pa Diblaim, ci Gomer ogamo ic, ci onywalo latin laco. 42

Ci Rwot owaco bot Kocea ni, “Cak nyinge Jejreel, pien odong kare manok, ci abiketo mere pwod ikom ot pa Yeko pi remo ma en oonyo i Jejreel, dok abimiyo ker me ot pa Icrael dong gik woko. 5Dok inino meno abituru teko pa mony me Icrael woko ki i nota me Jejreel.”

6Gomer dok ogamo ic, ci onywalo latin nyako, ci Rwot owaco bot Kocea ni, “Cak nyinge Lo-rukama,3 pien pe dok abimede ki timo kica ikom ot pa Icrael pi balgi kadi ki acel, dok pe bene abinyutu botgi mar mera. 7Ento abitimo kica ki ot pa Juda, abilarogi pi tek pa Rwot Lubangagi; ento pe abilarogi ki atum, kadi ki pala lucwan, nyo ki lweny, nyo ki aguragura, kadi ki wegi aguragura.”

8Ka dong Gomer ogengo latin cak, ci ogamo ic, onywalo latin laco. 9Ci Rwot owaco ni, “Cak nyinge, Lo-ammi,4 pien jo Icrael pe gubedo jona, dok an bene pe Lubangagi.”

Kibiroco Icrael

105

Ento wel jo Icrael bibedo macalo kweyo me dog nam, ma pe pime, dok ma pe kwane bene; dok i kabedo kama yam kiwaco botgi ni, “Wun pe wujona,” kibiwaco botgi ni, “Wun lutino pa Lubanga makwo.” 11Jo Juda ki jo Icrael gibicoke kacel, ci gibiketo ngat acel ma bitelo wigi; ci gibia woko ki i lobo meno, pien nino pa Jejreel bibedo dit tutwal.