Kocea 14

Kocea okwayo Icrael me dok bot Rwot

1In Icrael, dong idwog bot Rwot Lubangani, pien dong itwomo tyeni pi bali. 2Wudwog cen bot Rwot, ci wumii kwacwu me kica obed gityerwu; wuwac bote ni, “Kwany balwa woko ducu; gam motwa, ci wan wabipako in kit ma wacike kwedeni. 3Aciria pe bilarowa matwal, kadiwa aguragura bene pe bigwokowa. Dong pe wabiwaco ki cal ma watiyo atiya ki cingwa ni, ‘Wun Lubangawa.’ Ai Rwot, jo ma lacungudwargi peke ginongo kica ki boti.”

Rwot ocike me miyo kwo manyen bot jo Icrael

4Rwot waco kuman ni,

“Abidwogo jona cen bota.

Abimarogi pi bercwinya,

pien kinigana dong oa woko ki ikomgi.

5Abibedo macalo toyo bot jo Icrael;

en bituru macalo lenga

ci bicwalo lwite piny macalo atega.

6Gibilot, ci gijany,

gibibedo ber macalo jeituni,

dok ngwecgi bibedo kur macalo ngwec Lebanon.

7Gibidwogo ci gibibedo ite gwok ma mera,

gibinywal macalo kal ma i poto; gibituru calo olok,

ngwecgi bibedo makur macalo ngwec kongo bwino me Lebanon.

8Jo Icrael pe dong gibiworo cal jogi.

An abigamo legagi,

dok an abigwokogi.

Macalo yat ciprec ma pote pe ner, kitmeno bene abigwokogi;

an aye abimiyo gum nya botgi.”

Ladol lok

9Ngat maryek biniang lok magi; dano ma cwinye lwodo lok aye bingeyogi; pien yo pa Rwot ducu tye atir, jo ma cwinygi atir aye gilubu yone, ento jo ma gikalo wi cik pa Lubanga gitwomo tyen gi iye.