Kocea 13

Ngolo kop me agiki ikom jo Icrael

1Epraim ka yam oloko, onongo kom kaka ducu ma i lobo Icrael myel; Epraim yam dit matek i Icrael; ento en okelo bal ikome pi woro jok Baal, ci en koni dong bito woko pi bale. 2Kombedi balgi dong tye kamede ameda, gitye katiyo gigi cal ryal ma giliyo pirgi ken gi, kun gitiyo lwak cal jogi ki diro; magi ducu weng obedo tic pa ludiro. Gin guwaco ni, “Wutum gitum bot jogi magi.” Gin ango ma myero owek dano gunot lem latin twon dyang! 3Pimeno gibibedo calo lupuu ma poto odiko, calo toyo ma o woko oyotoyot, calo cung kal ma yamo kolo woko ki i laro, onyo yito ma duny ki i wang dirica.

4Ento Rwot waco kuman ni, “An a Rwot Lubangani, an aye yam atelowu woko nia wa ki i lobo Ejipt; pe tye Lubanga mukene ma ingeyo, kono an keken, lalar mo mukene pe tye, kono an keken. 51An aye yam agwokowu i tim aroo, i lobo ma can pii dwong iye. 6Ento ikare ma wucamo wuyeng, ka wuyeng, ci cwinywu ocako pong ki waka matek; omiyo wiwu owil woko ikoma. 7Pimeno dong abiloke botwu adoko macalo labwor, ci dok abibedo kakiyowu inget yoo macalo kwac. 8Abipoto ikomwu macalo nguu mager ma kikwanyo lutinone woko, ci abiyeco korwu adado woko, dok abimwodowu macalo labwor; kit ma lee tim kilo ki komgi.

9Wun jo Icrael, abityekowu woko; anga kono ma bikonyowu? 10Yam onongo wumito ni kimii botwu rwot ki lutela do, 2ento kombedi dong rwotwu tye kwene maromo larwu? Rwodiwu ducu gitye kwene ma gin obedo lucungdwarwu? 113Ceng amiyowu luker ikare me kiniga, ka dok akwanyogi woko bene ki akemona.

12Bal pa Icrael maracu ducu tye kicoyo woko piny, bale dong bene kikano woko. 13Icrael kimiye gum me bedo kwo, ento en latin ma pe ryek; en calo latin ma kare me nywalone dong oromo woko, ento obutu arii ci omoko woko i ic, wiye pe otike ki yoo nyodo. 144Dong pe abilarogi ki i twer me lyel dok pe bene abikokogi woko ki i dog to. Abimiyo two gemo poto ikomgi. Abimiyo gito ci kiyikogi woko ilyel. Kica dong pe maka ikomgi. 15Kadi bed en nya matek macalo lagada, yamo oro ma abicwalo bibino ki i tim, ci wang piine ma gunyeni bitwo woko ki itte bene bidwon woko; yamo bimayo jamine mabeco ducu mayam yomo cwinye, ma en onongo okanoni. 16Camaria bineno can pi bale, pien en ojemo woko ikom an Lubangane. Pala lucwan aye binekogi woko, lutinogi kibijwatogi woko piny, ci kinyotogi woko, ki mon gi ma giyac kibiryeko igi woko.”