Joel 1

1Man lok pa Rwot mayam obino bot Joel wod pa Petuel.

Dano gukumu pi bale pa cam ma i poto

2Wuwiny lok man, wun ludongo ma otegi,

wuter itwu, wun jo ducu ma wubedo i lobo man.

Gin macalo man kong yam dong otime

ikarewu, onyo ikare pa kwariwu?

3Wutit pire bot lutinowu,

wek lutinowu gutit bot lutinogi,

ki likwayogi bene guwac bot yalwak ma bilubugi.

4Gin ma bonyo adwek ocamo odong, bonyo abum ocamo woko.

Gin ma abum ocamo odong,

bonyo lagara ocamo woko.

Gin ma lagara ocamo odong,

labar ocamo otyeko woko liweng.

5Wucoo woko, wun jo ma lumero, wukoki;

wukok matek, wun jo ducu ma mato kongo bwino,

pi kongo bwino malingoni,

pien dong kityeko nyig olok woko me yubu botwu kongo bwino malingoni. 61

Pien lwak bonyo dong ocore i lobo ma calo rok matek2 ma dong obino ka lweny ikom lobona,

mony matek ma pe kwane, lakgi tek calo lak labwor,

ki lakgi bene boco calo lagili lak min labwor.

7Gubalo olokwa woko ducu, ki oduruwa bene gungido woko;

gupaco poke, gubolo woko piny,

janggi okwor woko matar ligwek.

8Wukok, macalo nyako ma oruku bongo cola,

ma kumu pi cware ma pud onyome anyoma.

9Gityer me moko kwon ki gityer amata ma omyero kikel i Ot pa Rwot dong peke.

Ajwaki ma lutic pa Rwot, gitye kakumu pien gityer me amiya bot Rwot dong peke.

10Poti dong odong nono labongo gin mo iye,

obedo calo lobo ma dong tye kakumu.

Ngano ki cayiri obale woko,

nyig olok bene otwo woko omiyo kongo bwino dong peke,

moo pe pien Jeituni ducu dong gutwo woko liweng i poti.

11Cwinywu myero otur, wun lupur, wukok matek,

wun lupur olok ki ngano ki cayiri;

pien cam me poto dong obale woko.

12Olok oner,

oduru bene obale woko;

okwer pomegranat, ki otit ki acuga, yadi ducu ma i poto guner woko;

yomcwiny dong peke bot dano.

13Wuruk bongo cola, wun ajwaki, wukok can,

wukok matek, wun lutic i keno tyer.

Wudony i ot, wubut i bongo cola,

wun lutic pa Lubanga.

Pien gityer me moko kwon ki gityer amata

dong kijuku kelogi woko i Ot pa Lubangawu.

14Wukwer kare me rii kec,

wulwong coke madit me woro Lubanga.

Wucok ludongo ki jo ducu ma gibedo i lobo man,

wek gubin i Ot pa Rwot Lubangawu,

wek gukok bot Rwot. 153

Nino pa Rwot dong onyiko cok;

en nino ma Rwot dong bibalo lobo woko

nino meno bibino ki topiny madit atika.

16Cam dong kibalo ki i nyimwa ma wangwa neno.

Yomcwiny ki um dong peke i Ot pa Lubangawa.

17Kodi otung woko i ngom kama kicoyogi iye,

dula odong nono;

dero ducu obale woko, pien ngano pe ocek.

18Winy kit ma lee cur kwede!

Piny oloyo dyangi woko,

pien kakwayogi dong peke;

wa romi bene gujony woko lingok.

19Akok boti, ai Rwot,

pien olet ma i tim kacel ki yadi ducu ma i poti

dong gutwo woko macalo mac aye dong owangogi.

20Wa lee me tim ducu gikok boti,

pien pii ma i nota dong otwo woko,

mac dong owango olet ma i tim woko.