Kocea 10

1Icrael onongo obedo calo olok ma nyige onyak ma mwonya, ci ocek mabup. Ka nyige omede ki nyak madwong, ci en bene omede ki cano keno tyer mapol; ka lonyo me lobone omede odoko madwong, ci en bene omedo ki yubu wir jogi me aworane mabeco. 2Cwinygi opong ki lok me mingo; kombedi myero dong gunen can pi balgi. Rwot kikome aye bimuku keno tyergi woko, dok en bene bitongo wir jogigi woko ducu ma gucibo me aworagi.

3Koni dong gibipenye ni, “Pe watye ki rwot pien wan dong onongo pe walworo Rwot Lubanga, dok kadi bed onongo watye ki rwot, en kono onongo twero timowa kit gin ango?” 4Giloko lok doggi nono, gimoko gicike ki kwong me goba; kumeno gimiyo tim maracu twi dongo macalo yat matye ki kwir ma neko dano ma dong olot i poto ma kipuru.

5Jo ma gibedo i Camaria komgi bimyel, pi latin twon jabu me Bet-aven. Jo mere ducu gibikwero colane, ajwakine ma giworo cal jok gibikok pire, pi deyone ma dong oa woko ki bote. 6Cal twon meno kikome aye kibitero woko wa i Aciria, macalo mot ma kitero bot rwot madit. Kibimiyo lewic mako Icrael, dok bene lewic bimake pi cal jogine. 7Rwot me Camaria pe binen, kibitero woko macalo yat ma ongide ma kwang iwi pii. 81Kabedo madito me woro Lubanga matye iwi got me Aven, en aye kama Icrael tiyo iye bal, kibijwero woko. Okutu ki ocok gibitwi iwi keno tyergi, ci gibiwaco ki godi madongo ni, “Umwa woko!” Ki bot godi matino bene ni, “Wupot ikomwa!”

Rwot otito pi ngolo kop ikom Icrael

9Rwot waco kuman ni, 2“In Icrael ibedo katimo bal nia wa ikare me Gibea; nia wa ikare ca wubedo kamede ameda. Pimeno mony bipoto ikomwu i Gibea. 10An abibino kapwodo jo ma ojemo; lurok bene bicoke kacel ikomgi ikare ma abipwodogi pi balgi aryonu.

11Icrael yam calo roya ma kipwonyo, ma maro tic me dino ngano. Ento aketo rii kweri ingute maberi wek otii tic matek me ywayo kweri dyang me pur. Aweko Juda bene oywayo kweri dyang dok Icrael bene onudu poto. 123Wucer poto bot woko, wucoo kodi me kit ma atir, wek wuka nyig me mar ma pe loke, pien man aye kare me yenyo Rwot, wek en obin omii lar mere ocwer ikomwu macalo kot. 13Yam wupuru bal, ci wukayo kit ma pe atir, omiyo wucamo nyig gobawu. Pien wubedo kageno gadigadi lwenywu, ki lwak twoni otekawu, 14pimeno oduru me lweny biwo ikin jowu, odiwu ma kirumu ki cel gogo kibimuku woko liweng, macalo Calman yam omuku Betarbel ikare me mony, megi lutino yam kinyotogi woko kacel ki lutinogi. 15Meno en kit ma kibitimowu kwede, wun ot pa Icrael, pi balwu madit tutwali. Ka lweny bicake kwarpiny, ci kibineko rwot me Icrael woko cut.”