Kocea 11

Mar pa Lubanga ikom jone ma lujemoni

11

Rwot owaco ni,

“Ikare ma Icrael pud latin, onongo amare,

yam alwongo woda nia ki i Ejipt.

2Ento kayam amede ki lwongogi,

ci gin bene gumede ki a woko ki bota;

gubedo gigi katumu gitum bot jok Baal,

kun bene giwango odok eceta bot cal jogi.

3Kun kono an aye ceng apwonyo jo Icrael ki wot,

yam atingogi ikora;

ento pe gungeyo ni an aye acangogi.

4Yam abedo katelogi ki tol,

ki twon mar madwong ma atweyogi kwede.

Dok abedo katingogi macalo latin,

ma abolo iwi gwoka,

kun akule botgi piny kapitogi.

5Gibidok woko wa i lobo Ejipt, ci Aciria aye bibedo rwotgi, pien gukwero dwogo bota. 6Pala lucwan bilweny ikom taun gi madito ducu, bitongo rii dogola me dog celgi woko, dok bene binekogi woko ki i cel gogogi. 7Jo mera dong gumoko tamgi me a woko ki bota; pimeno gibikok bot En Mamalo Twal pi okol ma kiketo ingutgi, ento pe tye dano mo ma bigonyogi. 82

Atwero weki woko ningning ka, in Icrael?

Atwero miyi bot ngat mukene ningning, in Icrael?

Atwero miyo idoko calo Adma ningning?

Abitimo in macalo Jeboim3 ningning ka?

Cwinya dong odwogo woko ikomi,

iya dong okwe woko ikomi pi maro in.

9Pe dong abitic ki kiniga malyet ikomi,

dok pe abineko jo Icrael atyekogi woko;

pien an Lubanga,

pe a dano, an a Ngat Maleng ikinwu,

pe abibino botwu ki kiniga pi tyekowu woko.

10Jona gibilubu kora ikare ma abimor macalo labwor ikom lukworgi; eyo, gin gibibino kun gia ki tung kupotoceng ma komgi myel. 11Gin bia ki i Ejipt gibino oyotoyot calo winyo, dok gibia ki i Aciria macalo amam, ci abidwokogi wa i pacigi, man lok pa an Rwot kikome.”

Kingolokop oloyo Icrael ki Juda

12Rwot waco ni, “Jo Icrael dong gugura woko dyere ki gobagi kun gibedo mere kaloko bwola keken, ki jo Juda bene gitye kajemo ajema ikoma, an Lubanga ma gene dok Ngat Maleng me Icrael.