Jo Ibru 8

Ajwaka madit pa Lubanga me gicike manyen

11

Kombedi gin ma pire dit ma watye ka lokone kany en aye ni: Wan watye ki ajwaka madit pa Lubanga macalo man, madong obedo i kabedo me deyo tung acuc inget komker pa Won Deyo Madit i polo. 2En tiyo tice i Kabedo Maleng, i kema me ada ma Rwot aye oguru, ento pe dano. 3Ajwaka madit pa Lubanga acel acel kiyere me miyo mot ki tyero gitum bot Lubanga; pimeno mite bene ni Yecu myero obed ki gin mo me atyera. 4Kono nene en tye i lobo kany, kono pe obedo ajwaka pa Lubanga wa ki acel, pien ajwaki pa Lubanga dong tye ma gimiyo mot kun gilubu Cik pa Moses. 52 Ento gin ma gitiyo kiporo ki tipu ki cal keken me Kabedo Maleng matye i polo; pien ikare ma Moses dong yam cok guru kema, Lubanga ocike ni, “Nen ni itiyo jami ducu kun ilubu kit cal ma kinyuti ki iwi got.” 6Ento kit macalo tye, Kricito dong onongo tic maber atika makato meggi ni woko, rom ki kit gicike ma en oyubu ma obedo ber matek makato mukene macon ca, pien Lubanga omoko kun onongo ociko pi miyo jami mabeco makato. 7Kono ka bal mo obedo pe i gicike mukwongo, kono onongo gicike mo me aryo dong pe mite. 83

Ento Lubanga onongo bal tye ikomgi, pien owaco ni,

“Kare biromo, man lok pa Rwot,

ma abimoko iye gicikena manyen ki jo me dogola pa Icrael,

ki jo me dogola pa Juda.

9Pe dok bibedo calo gicike mayam aketo ki kwarigi ca,

ikare mayam amako kwede cinggi ci akwanyogi woko ki i lobo Ejipt;

pien gin yam pe gulubu gicikena,

omiyo an bene atenyogi woko ata, man lok pa Rwot

10Man aye gicike ma abiketo ki jo me dogola pa Icrael

ka kare meno oromo, man Rwot aye owaco:

Abiketo cika ducu itamgi,

abicoyo bene bedo i cwinygi.

An abibedo Lubangagi,

gin gibedo jona.

11Ngat mo dong pe bipwonyo lutugi,

dok ngat mo bene pe ma biwaco ki lawote ni, ‘Nge Rwot,’

pien gin ducu gibingeyo an,

cake ki ikom jo rwomgi piny ma ikin gi, oo kwede wa ikom jo rwomgi malo.

12Pien abitimo botgi kica i timgi maracu ducu,

pe dok abipo ikom balgi mo kadi ki acel.”

13Ka oloko pi gicike manyen, en tamo pi gicike mukwongo ca macalo gin ma karene okato woko. Gin ma karene dong okato, ma otii woko bene, nongo dong cok rwenyo woko.