Jo Ibru 7

Kit pa Melkijedek ma obedo ajwaka pa Lubanga

1Melkijedek man yam obedo rwot me Calem, dok bene ajwaka pa Lubanga Mamalo Twal. En orwate ki Abraim ikare ma Abraim onongo dong dwogo ki ka neko luker ca, ci cut olamo gum ikom Abraim; 2ka dong Abraim opoke dul acel me apar me jami ducu ma en onongo. Mukwongo en rwot me kit ma atir, man aye telok me nyinge, dok bene en rwot me Calem, ma teloke ni, “Rwot makelo kuc.” 3Pe tye gin mo ma nyutu lok kom wone nyo mine nyo kwarine, acaki me karene, kadi wa agiki me kwone bene pe kinyutu. En obedo cal ki Wod pa Lubanga, en bedo ajwaka nakanaka.

4Kong wunen kit ma en dit kwede! Abraim, ma en aye kwarowa, yam omiyo bote dul acel me apar me jami ducu ma en oyako. 51 Dong jo ma ikin likwayo pa Levi ma gubedo ajwaki pa Lubanga, Cik pa Moses yam ocikogi me jogo dul acel me apar ki bot jo Icrael. Meno onongo kijogo ki bot utmegigi, kadi bed gin bene gubedo likwayo pa Abraim. 6Ento danonu, ene Melkijedek ma kwarone pat ki meggi ni ogamo dul acel me apar ki bot Abraim, ka dok olamo gum ikom ngat ma Lubanga ocike bote. 7Pe dok tye akalakala mo me waco ni, lalam gum dit kato ngat ma en lamo gum ikome. 8Dok ki tungcel waneno ni, Lulevi ma gijogo dul acel me apar gin jo ma to woko, ento ki tung bot Melkijedek en ngat ma jogo acel me apar en ngat mayam kicoyo lok ikomeni pud kwo. 9Ngat mo twero waco ni, ka Abraim, omiyo dul acel me apar, Lalevi bene kikome, ma jogo dul acel me apar, yam bene omiyo mere kun wok ki bot Abraim, 10pien ikare ca onongo en pud tye ikom Abraim macalo nyig kodi ma Melkijedek orwate kwede ca ci bene ogamo acel me apare ki bot Levi.

11Dong ka kono yam gin ducu twero cobe kakare pi ajwaki pa Lubanga ma gin Lulevi, ma jo Icrael yam gunongo cik pa Lubanga kacel kwedgi ni, pingo ki mito ni ajwaka mukene dok obin ikit pa Melkijedek, kun pe kiwaco ni, ikit pa Aron? 12Pimeno ka dong kiloko ajwaka pa Lubanga, ci cik bene myero kilok woko. 13Pien Rwotwa ma kiloko lok magi ikomeni obedo dano me kaka mukene, ma ngat mo ikin gi peya otiyo tic mo ikom keno tyer. 14Ngene gire maber ni, Rwotwa yam oa ki ikin likwayo pa Juda, dok Moses yam pe oloko lok mo ikom kaka meno ma mako ajwaki pa Lubanga.

Ajwaka pa Lubanga mukene ma cal ki Melkijedek

15Lok man dong otyeko nen woko kamaleng makatone ka ajwaka pa Lubanga mukene otuc macalo Melkijedek, 16ma odoko ajwaka pa Lubanga, pe pi cik mo ma lubu kaka, ento pi tek me kwone ma gin mo pe romo tyeko. 172 Pien coc mayam kicoyo oloko ni,

“In i bibedo ajwaka pa Lubanga nakanaka,

ikit pa Melkijedek.”

18Cik macon dong kibolo woko, pien onongo goro, dok konye pe, 19pien Cik pa Moses yam pe ocobo gin mo kakare, ento kombedi dong kikelo gen mo maber makato, ma dong twero miyo wanyiko cok bot Lubanga.

20Medo ikom meno bene, Lubanga yam okwongo kwong ikome. Jo mukene ca gudoko ajwaki labongo kwong mo, 213 ento Yecu odoko ajwaka pi kwong pa Lubanga mayam owace ni,

“Rwot dong okwongo kwong,

ma pe dok biloko tame,

‘In ibedo ajwaka nakanaka.’”

22Meno omiyo gicike ma Yecu ocung pire obedo ber makato mukene ca.

23Ajwaki pa Lubanga mukene ca onongo yam welgi dwong, pien to onongo ogengo nyimgi woko wek pe gumede ki tic. 24Ento Yecu bedo i dog tice me ajwaka pa Lubanga matwal, pien en bedo kwo nakanaka. 25Ma omiyo ikare ducu en tye ki twer me laro jo ma nyiko cok bot Lubanga, kun giwok ki bote, pien en bedo kwo kare ducu ka bako doge bot Lubanga pirgi.

26Ajwaka madit macalo meno aye maromo cobo mitiwa. En leng, gin mo marac pe i iye, cilo me bal bene pe ogude. Yam kipoko en woko ki ikom lubalo, ci kitinge malo iwi polo. 27En pe calo ajwaki mukene madito ca, ma gityero gitum bot Lubanga jwijwi, mukwongo pi balgi ken gi, ka lacen dong pi bal pa lwak. Yecu otyero gitum kicel keken ma otyeko lok ducu ikare ma omine kene macalo gitum. 28Adada, Cik pa Moses yero jo magoro ketogi bedo ajwaki madito pa Lubanga, ento lok me kwong ma kikwongo lacen inge cik, oyero Wod pa Lubanga oketo obedo mupore matwal.