Jo Ibru 6

1Pimeno, kong dong waweku lok mukwongo ikom Kricito, ento wamede anyim ki pwony pa jo muteggi, kun pe dok wanwoyo keto tegutine, ma en aye ngut ikom tic ducu mayam kwo pe iye, ki moko niyewa ikom Lubanga, 2ki dok me pwonye ikom lok magi: kit batija mapatpat, keto cing iwi dano, cer pa jo ma oto, ki kop ma kingolo matwal. 3Wabitiyo man giwa ka Lubanga oye. 4-5Jo ma kong dong ceng oryeny omenyogi kicel, ma gubilo mot ma oa ki i polo, kun gibedo ikin jo mulimo Cwiny Maleng, ma bene dong gutyeko bilo lok pa Lubanga kit ma mit kwede dok gubilo gin ma bitime ikare ma bibino ianyim, kit jo macalo meno ka gungak woko, pe dok kitwero rocogi wek gudok manyen ka dong gunguti. 6Ka dong gungak woko, meno gitye ka guro Wod pa Lubanga ikom yatariya pirgi ken gi, kun giketo lewic ikome inyim lwak. 7Pien Lubanga miyo gum ikom lobo ma mato kot ma cwer ikome kare ki kare, ka dok ceko ginapita ma konyo jo ma gipuru pirgi. 81 Ento kace onyayo okutu ki ocok, konye nongo dong pe, kuru mere acena pa Lubanga keken, agikine en aye mac ma kibiwango kwede woko. 9Ento kadi bed aloko kit man, wun luwota, kadi bed waloko kit man, wageno ni wutye maber ma wukato jo meno ilok ma dok i lare. 10Pien Lubanga gire pe ye gin ma pe tye kakare, wiye bene pe biwil ikom tic mayam wutiyo, kadi ki mar ma wunyutu pire ki konyo jo pa Lubanga, ma pud wutye ka konyogi bene wa ikareni. 11Dong wamito ngat acel acel ikinwu oket cwinye nio wa agiki, wek omii gin ma wuketo iye genwuni ocobe kakare. 12Wek pe wudok luwackom, ento wulub kit pa jo ma pi niyegi, ki pi diyo cwinygi, gitye ka nongo gin mayam Lubanga ociko pire.

Cike me ada pa Lubanga

13Ikare ma Lubanga cike bot Abraim, kit macalo onongo pe tye ngat mo makateni ki dit ni ma myero en okwong ki nyinge, en okwongo ki nyinge kekene, 142 kun waco ni, “Adada abimini gum, dok abimiyo likwayu ginya gidoko mapol.” 15Dong Abraim pi diyo cwinye omiyo en onongo gin mayam Lubanga ociko pire. 16Ka dano mo kwongo kwong ci kwongo ki nying ngat madit loye, dok ka pyem mo tye ikin dano, lok ma kimoko ki kwong aye matyeko pyem meno. 17Man aye gin ma omiyo Lubanga omoko cikene ki kwong, pien onongo mito nyutu maber tutwal bot jo ma myero gunong gin ma kiciko pire ni, gin ma en dong etyeko yubu, pe dok ebiloko woko. 18Tye dong jami aryo ma pe dok loke, ma Lubanga pe twero bwolo iye dano.3 Piman, wan jo ma waringo walaro bote watye ki gin ma cuko cwinywa matek wek wamak gen ma kiketo inyimwa. 194 Watye ki gen man macalo lajuk me mel, ma cwinywa cung iye matek, ma pe wawire atata. Gen meno dong odonyo wa i Kabedo Maleng i Ot pa Lubanga, inge bongo kicika, 205 kama Yecu otelo yo odonyo iye pirwa, kun dong odoko ajwaka madit pa Lubanga ma bedo nakanaka ikit pa Melkijedek.