Jo Ibru 3

Yecu dit kato Moses

1Pimeno, wun utmegina maleng ma Lubanga olwongowu kacel kweda, kong wutam lok ikom Yecu ma en lakwena dok ajwaka madit me niye ma wan watucuni. 21 En obedo lagen bot Lubanga ma oyere dok okete i tic, marom aroma ki Moses mayam obedo lagen i ot pa Lubanga. 3Lager ot kimiye deyo madit makato ot; kitmeno Yecu bene nene kimiye deyo madit makato pa Moses woko. 4Pien ot mo keken dano aye ma gero, ento ngat ma gero jami ducu en aye Lubanga. 5Moses yam obedo lagen i ot pa Lubanga macalo latic, pi miyo caden ilok ma kibilokone ikare ma lacen. 6Ento Kricito obedo lagen ikom ot pa Lubanga macalo Wode. Wan aye wa ode kace wamoko matek i tekcwinywa, ki i wakewa pi gen ma watye kwede.

Yweyo pi jo pa Lubanga

72

Dong macalo Cwiny Maleng oloko ni,

“Ka wuwinyo dwon Lubanga tin,

8pe wumii cwinywu obed nwang calo jo mayam gujemo,

ikare ma guomo kwede cwinya i tim,

9kama kwariwu guomo iye cwinya, gutema bene iye,

kun gibedo kaneno tica pi mwaka pyere angwen kulu.

10Pimeno cwinya owang ikom jo me kare meno,

omiyo awaco ni, ‘Gin kare ducu gungak woko itamgi;

gin pe gingeyo yona wa ki acel.’

11Macalo yam akwongo ki kiniga ni,

‘Gin pe bidonyo i yweyo bota.’”

12Wugwoke, utmegina, wek ngat mo ikinwu pe obed ki cwiny marac, cwiny ma pe ye Lubanga, matwero miyo en a woko ki bot Lubanga makwo. 13Ento omyero wujing cwinywu kekenwu kare ducu ka pud wutwero lwongo ni, “Tin”, wek ngat mo ikinwu pe cwinye odok nwang pi bwola me bal. 14Pien wan wabedo jo ma ribe ki Kricito, kace wamoko matek igenwa mukwongo nio wa i agiki, 153 macalo yam kiwaco ni,

“Ka wuwinyo dwone tin,

pe wumii cwinywu obed nwang calo jo mayam gujemo.” 164

Angagi mayam guwinyo dwon Lubanga ci gujemo wokoni? Pe gin lwak dano ducu mayam gua ki i lobo Ejipt ma kun Moses aye obedo ka telogi? 17Dok angagi ce mayam cwinye owang ikomgi pi mwaka pyere angwen kuluni? Pe gin aye jo mayam gutimo bal, ma guto ci komgi odong i tim kunu? 18Dok en yam pe okwongo kwong bot jo mene ce ni, gin pe gibidonyo i yweyo bote? Pe okwongo kwong meno bot jo mayam pe gubedo luwiny? 19Pimeno wan waneno ni, jo meno yam pe gutwero donyo pien onongo gukwero ye Lubanga.