Jo Ibru 2

Lare ma pire dit tutwal

1Pimeno wan myero waketu cwinywa tutwal i gin mayam wawinyo, wek pe wangak woko ki iye. 2Lok me kwena mayam lumalaika gukelo onongo obedo lok ada. Ka ngat mo okalo wi cik mo, nyo okwero winyo, kimiye can iye ma oporo bal ma en obalo. 3Wan kono dok wabibwot ningning ka pe waketo cwinywa i lare man ma pire dit tutwali? Lare man Rwot aye mukwongo tucu pire, ka dong jo mayam guwinyo ki bote, gumoko botwa loke. 4Lubanga bene omedo cadene kun tiyo lanyut mogo ki tango ki tic madito mapatpat, dok kun bene poko mot mogo me Cwiny Maleng pi mitine kene.

Latel wiwa i yo me lare

5Pien Lubanga pe oketo lobo ma mito bino ma wan waloko pire ni i teloc pa lumalaika. 61 Tye kamo ma kitucu kamaleng ni,

“Dano gin ango, ma omiyo ipo pirgi?

Dano adana mamwa ma omiyo iparo pirgi?

7Iketogi ki piny ite lumalaika pi kare manoknok,

imiyo ki gin woro madit dok iruku lalukana me deyo iwigi kit ma ki woro kwede rwodi;

8iketogi me bedo lulo jami ducu.”

Dong ka oketo jami ducu ite loc pa dano, pe oweko gin mo ma pe giloyo, kadi bed ikare man, pud peya waneno ka kiketo jami ducu ite twerogi. 9Ento wan waneno Yecu mayam kikete piny ite lumalaika pi kare manoknok, ento kombedi dong kimiye deyo ki woro macalo rwot pi arem me to ma en ociro, wek pi kica pa Lubanga en obil to pi jo ducu.

10Jami ducu tye pi Lubanga, dok en aye muketogi. Dong ka yam en omito kelo lutino mapol ideyone, gin ma en otimo obedo ma myero tutwal, en ma omiyo latel wigi i lare odoko dano muteggi pi ciro can. 11Ngat ma olonyogi bedo maleng, ki jo ma kilonyogini, gin ducu gua ki ikom ngat acelu, ci en ki jo ma kilonyogi gitye ki won gi acel; man en aye gin ma omiyo lewic pe mako Yecu me lwongogi ni omegine, 122 kun en waco ni,

“Abitito nyingi bot utmegina pi gin ma itiyo,

abipaki ki wer i dye lwak mucoke.” 133

Dok ni,

“Abiketo gena ikome.”

Ki dok ni,

“An a ene, ki lutino ma Lubanga dong omiya.”

14Kit macalo lutino ikare ducu giribe ikom ki remo, en bene kitmeno onywako kwedgi komgi ki remogi, wek pi tone enginy woko ngat matye ki twer ikom to, meno en aye Catan, 15ka dong wek egony jo mayam gubedo itwec me opii pi kare me kwogi ducu pi lworo to. 164 Dong onen maber ni, gin ma en otimo pe okemo lumalaika, ento okemo likwayo pa Abraim. 17Meno gin ma omiyo en myero odok marom aroma ki utmegine i yo ducu, wek omii ebed ajwaka madit pa Lubanga ma lakica dok lagen i tic pa Lubanga, wek omii ekwany woko bal pa jone wek ki tim botgi kica. 18Pien en kikome yam bene oneno can dok Catan obite, en ma omiyo en twero konyo jo ma kibitogi.