Jo Ibru 1

Lubanga oloko kwedwa i Wode

1Yam con Lubanga oloko ki kwariwa i dul lok mapol dok i yo mapatpat, kun loko wok ki i dog lunebi; 2ento ikare man ma lacen ni en dong oloko kwedwa i Wode. Jami ducu matye, Lubanga ceng ocweyogi kun wok ki i wode, dok en oyubu ni myero en obed won jami ducu. 3En dero me deyo pa Lubanga, cal pa Lubanga kikome tye ikome, dok en bene ma tingo jami ducu matye ki teko me loke. Ma dong en otyeko tic me lwoko bal, en obedo piny i kabedo me deyo tung acuc inget Won Deyo Madwong matye malo i polo, 4kun dong en odoko ladit mada makato lumalaika ducu, marom aroma ki kit ma nying ma kimiye ber matek makato meggi woko.

Wod pa Lubanga dit kato lumalaika ducu

51

Lubanga yam kong owaco ki lamalaika mo ni,

“In i Woda,

tin dong anywali”?

Nyo dok ni,

“An abibedo Wone,

ki en bibedo Woda”? 62

Dok bene ikare ma okelo latin kayo i lobo en owaco ni:

“Lumalaika pa Lubanga ducu omyero guwore.” 73

Ikom lumalaika, Lubanga oloko ni,

“En loko lumalaikane doko yamo,

lutice en loko doko leb mac.” 84

Ento ikom Wode en oloko ni,

“Komkeri, in Lubanga, birii nakanaka,

odo keri en odo me ngolo kop atir.

9In imaro kit ma atir, cwinyi dag tim marac;

pimeno Lubanga, ma en Lubangani, owiri ki moo,

moo me yomcwiny madwong,

makato luwoti ducu.” 105

En dok oloko ni,

“In Rwot i wiati iketo guti me lobo,

polo bene en tic me cingi.

11Gin birwenyo woko oyot,

ento in rii nakanaka;

gin ducu gibitii macalo bongo,

12ibidologi woko macalo ibano bongo,

kibilokogi macalo ginaruka.

Ento in ibedo ma kiti tye acel,

mwakani pe bigik.” 136

Lubanga yam pe owaco ki lamalaika mo ni:

“Bed ingeta tung acuc i kabedo me deyo,

nio ka abimiyo lukwori

gidoko kom laten tyeni”

14Lumalaika kono dok gubedo angagi? Gin ducu gubedo cwiny mogo ma tiyo tic pa Lubanga; en orogi ka konyo jo ma binongo lare.