Jo Ibru 12

Lubanga Wonwa

1Dong kit macalo watye ki lwak caden mapol marom meno ma orumuwa woko dyere, myero kong dong wabolu gin manuruwa woko ducu, ki bal bene ma maro tweyowa woko liking, wek waringu dong ngwec me pyem matye inyimwa, kun waciro bene peko matye iye. 2Wanenu Yecu ma en aye latel wiwa ilok kom niye, en ngat ma ocobo niyewa kakare. Pi yomcwiny ma kiketo inyime en yam ociro can ikom yatariya, kun ocayo lewic ma kiketo ikome; ento kombedi dong obedo piny i kabedo me deyo yo tung acuc me komker pa Lubanga.

3Wubed ki tam ikome, ki kit ma en ociro kwede adagadaga marac tutwal ki bot lubalo, wek pe wuol, ki iwu bene pe oari woko. 4I lwenywu ma wulwenyo ki bal pud peya wulwenyo wuo wa i oyo remowu. 51 Nyo wiwu owil woko ce i coc mayam kicoyo me cuko cwiny dano, ma en loko kwedwa iye macalo lutinone? Ni meno,

“Latina, pe i caa pwony pa Rwot;

ka en ogoyi, ii bene pe oari woko.

6Pien Rwot juyu jo ma en maro,

dok pwodo latin acel acel ma en jolo bote.”

7Wuden can macalo pwod ma wonwu tye ka pwodowu kwede me tirowu. Lubanga tye katic kwedwu macalo lutinone. Latin mene ma pe wone tengo? 8Kace owekowu labongo tirowu macalo lutinone mukene ducu, mono nyutu ni wun dong lutino luk, ento pe lutinone kikome. 9Kitmeno wan watye ki wegiwa me lobo man mayam gupwodowa, wan bene waworogi. Pe dong omyero wamine makato ite loc pa Wonwa me cwiny wek wabed kwo! 10Pien gin yam gupwodowa me tirowa pi kare manok mo keken ikit ma gin guneno ni ber, ento Lubanga pwodowa pi konyowa, wek omii wadok jo maleng macalo en. 11Kit pwod ducu, ka pud watye iye, pe watamoni obedo me yomcwiny, ento me kumu, ento i ngeye lacen kelo kuc keken bot jo ma gukato ki iye, pien nongo dong gudoko jo ma kitgi atir.

Dano pe gukwer kica pa Lubanga

122

Pimeno, wuting badwu mukwe ni malo, wurye congwu magoro, 133 wuyub yo ma tyenwu lubu obed atir, wek ngat ma tyene goro pe ongol woko, ento myero ocang woko acanga. 14Wuket tek me bedo ki kuc ki jo ducu, ki me bedo jo maleng; pien ngat ma pe leng pe bineno Rwot. 154 Wugwoke kun wuneno maber ni ngat mo pe okeng nongo kica pa Lubanga. Wunen ni ngat mo pe obedo macalo lwit yat makec ma ka otwi ci kelo ayela, dok balo jo mapol. 165 Wunen ni ngat mo pe obed latim abor ikinwu, nyo dano ma pe lworo Lubanga calo Ecau, mayam ocato dite me anywali me bedo latin kayo pi cam me tyen acel keken. 176 Pien wungeyo ni, lacen ka en omito ni wone olam gum ikome, ento wone okwere woko, kadi bed onongo mito ma kok ki pig wange, pien en yam pe onongo yo me ngut i gin ma en otimo. 187

Pien wun pe wubino igin ma kitwero gudu kome, ki mac mayam olyel iwi got Cinai, ki colpiny me mutu ma ocido woko licuc, ki yamo lapiru matek, 19ki koko tum, ki dwon ngat matye kalok. Jo ma guwinyo loke gubako doggi mada ni pe dok kimed loko lok mo botgi, 208 pien gin pe gitwero ciro cik ma kiketo, ni meno, “Kadi ki lee mo ka ogudu got, omyero kicel ki gweng kinek woko.” 219 Gin munen kunu obedo marac tutwal ma miyo dano lworo, man omiyo Moses owaco ni, “Lworo omaka adada ma koma myel amyela.” 22Ento wun wubino igot me Cion, ki gang pa Lubanga makwo, Jerucalem me polo, ki bot lwak lumalaika ma welgi pe kwane ma gucoke kacel ka woro Lubanga ki yomcwiny. 23Wun wubino i coke pa lutino kayo ma kicoyo nyinggi i polo, ki bot Lubanga ma en langolkop pa dano ducu, ki bot tipu pa jo ma kitgi atir, madong gimiyo gudoko jo mabeco muteggi, 2410 wun wubino bot Yecu, ma en aye layub gicike manyen ikin dano ki Lubanga, ki bot remo ma kikiro, ma tito pi gin maber makato gin ma remo pa Abel otito pire. 2511

Wugwoke pe wukwer winyo lok pa ngat matye kalok. Jo mayam gukwero winyo lok pa ngat ma ocikogi iwi lobo pe gubwot. Wan kono wabibwot ningning, ka wakwero winyo lok pa ngat matye ka cikowa ki iwi polo kuluni? 2612 Ikare maca, dwone oyengo lobo; ento kombedi en ociko ni, “Tyen mukene, pe dong abiyengo lobo keken, ento abiyengo wa polo bene.” 27Lok man ni, “Odong tyen kicel mukene,” nyutu ni, kibikwanyo gin ma yenge woko, meno ginacweya, ka gin ma pe yenge cako dong. 28Pimeno myero wapwoyu Lubanga, pien dong wanongo ker ma pe twero yenge, dok bene myero waworu Lubanga i yo matwero yomo cwinye, kun bene wamiye deyo ki lworo, 2913 pien Lubangawa en aye mac ma wango piny.