Jo Ibru 13

Tic ma yomo cwiny Lubanga

1Wumede ki mar ikinwu kekenwu macalo utmego. 21 Wiwu pe owil ka jolo welo, pien jo mogo mayam gugwoko welo onongo gugwoko lumalaika ipacogi kun pe gingeyo. 3Wupo pi jo matye i buc calo wutye kacel kwedgi i buc kunu. Wupo bene pi jo ma gitimogi ki tim marac, kit macalo wun bene wutye ikom. 4Jo ducu myero guket deyo ikom nyom, dok kitanda pa jo ma gunyome myero giwor obed maleng; pien Lubanga bingolo kop ikom lutim tim me abor ki jo ma balo nyomgi. 52 Pe wubed jo ma maro lim; jami ma wutye kwede myero oromwu, pien Lubanga yam oloko ni, “Pe abiboli, pe abibwoti ata.” 63 En aye gin ma omiyo cwinywa tek, kun wawaco ni,

“Rwot en lakony mera,

pe abibedo ki lworo.

Ngo kono ma dano twero timo ikoma?”

7Wupo ikom lutela wiwu macon, mayam gutitiwu lok pa Lubanga. Wutam pi kwogi ki gin maber ma oa iye, ka dong wulub niyegi. 8Yecu Kricito gire tye kite acel keken laworo ki tin ki nino ma pe tum. 9Pe wuwek pwony mogo mapatpat dok ma welo gurwenywu woko; ber kica pa Lubanga aye ma omii teko i cwinywa, pe pi cik me cam mogo ma dano ma gulubu bene pe gunongo iye kony mo. 10Watye ki keno tyer ma lutic i kema macon ca pe gitye ki twero mo me cam iye. 114 Pien lee mayam ajwaka madit pa Lubanga tero remogi i Kabedo Maleng me bedo gitum pi bal, komgi yam kiwango woko cen inge gony. 12Kitmeno bene Yecu yam oto wa cen woko inge dogcel, wek omii elony dano ki remone kikome wek gubed maleng. 13Pimeno myero wacitu bene woko inge gony, kun waciro anywar pire. 14Pien kany pe watye ki taun madit mo ma rii nakanaka, ento watye kayenyo taun madit matye ianyim macok bino. 15Dong wamiyo pakwa bot Lubanga ikare ducu macalo gitum ma kityero bot Lubanga, kun wawok ki bot Yecu; meno aye pak ma wamiyo ki dogwa ka watucu nyinge. 16Pe myero wiwu owil katimo gin maber, ki poko jami ma wutye kwede bene bot jo mukene; pien gitum macalo meno yomo cwiny Lubanga.

17Wuwiny lok pa jo ma telowu, dok wumiine ite locgi, pien gin gitye ka gwoko tipuwu labongo yweyo macalo jo ma Lubanga bipenyogi pi ticgi. Wumii gutii ticgi ki yomcwiny, ma pe wumiyogi peko mo, pien meno pe konyowu kadi ki acel.

18Wuleg Lubanga pirwa, pien wan wangeyo ada ni cwinywa gire leng, dok wamito ni watii gin maber kare ducu. 19Amedo cuko cwinywu ni wuleg Lubanga, wek odwoka botwu oyotoyot.

Lega me gikone

20Lubanga won kuc ma ocero Rwotwa Yecu Kricito ki ikin jo muto, ma en aye lakwat madit ma kwayo wan romine, pi remo me gicikene ma rii nakanaka, 21en myero omiwu gin ducu mabeco mamite, wek wutii wucob gin ma en mito; dok bene pi Yecu Kricito omyero en otii kwedwa gin ma yomo cwinye. Deyo obed bot Yecu Kricito nakanaka. Amen.

Lok me agiki

22Utmegina, alegowu ni wudii cwinywu i loka ma acoyo manoknok moni ma acuku kwede cwinywu. 23Myero wunge ni ominwa Temceo dong kigonyo woko; wabibino kwede ka nenowu, kace orune obino oyot. 24Wumot lutelawu ducu, ki jo pa Lubanga bene ducu. Jo wa ma oa ki i Itali gumotowu.

25Kica pa Lubanga obed kwedwu ducu.