Ejekiel 9

Pwod ma kiketo ikom Jerucalem

1Lacen awinyo Lubanga odange ki dwon malongo kun waco ni, “Wunyik cok, wun lunek ma wumito keto can ikom lubalo ma i taun madit man. Wun ducu wukwany jami lwenywu wubin kwede kun wumako i cingwu.” 2Cutcut co abicel gubino ki i dog gang mamalo matye tung kumalo me Ot pa Rwot; laco acel acel omako jami lwenye me nek i cinge. Laco mo bene ma oruku bongo camanini owoto kacel kwedgi, ci en owoto ki gin mo maromo coc kwede. Gin ducu gudonyo idyekal me Ot pa Rwot ci gucung inget keno tyer me mola.

3I karenu onongo deyo pa Lubanga pa Icrael maryeny tutwali oa woko ki ikom lukerubi kama yam en bedo iye kun kato ci obino ocung i dogola me Ot pa Rwot; ci Rwot olwongo laco ma oruku bongo camaninigini, ma onongo owoto ki gin me coc ilak ngeteni. 41Rwot owace ni, “Cit iwok ki idye taun madit me Jerucalem ducu, ci iket lanyut i tur nyim dano acel acel matye ki cwercwiny me can kun gicur pi gin me kwer ducu ma gitye katimone i taun madit me Jerucalem.”

5Dok awinyo bene ka Lubanga waco bot co mukene ca ni, “Wulub kore kun wuwok ki idye taun madit ci wunek dano. Pe wupar pi ngat mo, dok bene kica pe omakwu ikome. 6Wunek jo ma otii, awobe, anyira, mon, ki lutino bene matino, ento pe myero wugud kom ngat madong kityeko keto lanyut ikome. Wucak ki kany ki i kabedona maleng.” Ci gucako ki ludongo ma onongo gucung kunu i Ot pa Rwot.

7Lubanga owaco botgi ni, “Wubal Ot pa Rwot woko. Dok wupong dyekalegu ducu ki kom jo ma kinekogini. Dong wucit mewu anyim ki tic.” Guwoto gucito anyim, ci gucako neko dano ma gitye i taun madit. 8Ikare ma gitye kaneko dano, an dong onongo adong gira kena. Apoto piny i ngom aryeba ic, ci akok bot Rwot Lubanga Matwero ducu ni, “Ai Rwot Lubanga! Akemo mono dong omaki matek tutwal ikom Jerucalem ma omiyo dong ibino me cito ka neko jo ducu liweng ma gudong i Icraeli?”

9Ci Lubanga ogamo doga ni, “Jo Icrael ki jo Juda gutimo bal madito dok maracu adada. Gin gubedo ka neko dano i kabedo ducu ma i lobogi ci gumiyo lok me ngolo kop ma atir peke. Dok tim bwami omede onya i Jerucalem. Gin giwaco ni, ‘Rwot dong obwoto lobo man woko, dok Rwot bene pe neno.’ 10Dong ki tung bota, pe abiparo pirgi, kica bene pe bimaka ikomgi, ento abiculu kwor ikomgi pi gin ducu mayam gin gutimo.”

11Cutcut dano ma onongo oruku bongo camanini, matye ki gin me coc ilak ngeteni odwoko lok bot Rwot kun waco ni, “Dong atyeko tiyo gin ma onongo icika ni acit atim.”