Ejekiel 8

Ginanyuta me aryo ma Ejekiel oneno ikom Lubanga

8:1—10:22

Woro cal jogi i Jerucalem

1Inino dwe abic, dwe me abicel, mwaka me abicel madong wabedo kwede i opii, ludongo me Juda onongo gubedo i oda kun gitye kalok kweda. Cutcut tek pa Rwot Lubanga Matwero ducu obino opoto ikoma. 21Ci aneno gin mo manen calo dano. Cake ki i pyere tung piny, onongo nen calo mac malyel, dong a i pyere dok kwede malo onongo ryeny aryenya calo mola. 3Ci ocwalo gin ma obedo calo cing dano ci omaka ki yer wiya ka otinga kwede malo. Dong i ginanyuta man Cwiny pa Lubanga otinga malo oterawa i pol ikin polo ki lobo ci otera i Jerucalem. Cwiny pa Rwot otera i dog gang ma i iye matye tung kumalo me Ot pa Lubanga, kama onongo cal jok mo tye iye, en aye gin mamiyo nyeko mako Lubanga. 42

Ikare ma atye kunu aneno deyo pa Lubanga pa Icrael kit macalo onongo kong aneno kwede deyone i ginanyuta ma aneno idye nota. 5Ci Lubanga owaca ni, “Wod pa dano, ting wangi malo kombedi ci inen tung kumalo.” Atingo wanga malo aneno tung kumalo, ci aneno cal jok makelo nyeko tye cok ki keno tyer i dog gang meno tung kama kidonyo ki iye. 6Ci Lubanga dok owaca ni, “Wod pa dano, tika ineno gin ma jo Icrael gitye katimoneni, gin me kwer madito keken wek kiryema woko ki i kabedona maleng? Pud dok ibineno gin me kwer madit makato man ma gitimo.”

7Dok okela i dogola me dyekal; ikare ma aneno piny, ci aneno kor ot kama otuc. 8Ci en owaca ni, “Wod pa dano, muk kor ot kany.” Ka amuku kom ot, ci anongo dogola. 9En owaca ni, “Dony i ot ci inen gin me kwer ki me lewic ma gitye katimone kanyi.” 10Kitmeno adonyo idyere ci aneno kor ot ducu kigoyo iye kit cal ducu mapatpat. Cal gin malak alaka piny, ki cal lee mogo ma komgi kikeni ma kikwero, ki kit cal jogi ducu me ot pa Icrael ma onongo giworo. 11Dong onongo tye kunu jo pyere abiro ki, ikom ludongo me ot pa Icrael ma gucung inyim cal jogigu, kacel ki Jajania wod pa Capan ma ocung ikin gi. Dano acel acel onongo omako atabo weene i cinge, kun yito me odok eceta ma giwango duny cito malo macalo pol. 12Dok en owaca ni, “Wod pa dano, tika dong ineno gin ma ludongo me ot pa Icrael gitye katiyone, i mung i colpiny ca? Gin ducu gitye kaworo jogi i kicika ma opong ki cal lubangagu. Gin giloko keken gi ni, ‘Rwot pe nenowa, Rwot dong otyeko bwoto lobo man woko.’”

13Ci Rwot owaca ni, “Ibineno gin me kwer madito makato man ma gitimo.” 14Ci okela i dogola me dog gang matye tung kumalo me Ot pa Rwot; ci aneno mon gubedo kunu kun gitye kakok pi jok Tamuj.

15Ka openya ni, “Wod pa dano, dong ineno gin man? Pud dok ibineno gin me kwer madito makato magi woko.” 16Ci otera idyekal matye i Ot pa Rwot. Ci aneno co maromo pyere aryo wiye abic gitye cok ki dogola me Ot pa Rwot, ikin keno tyer ki kama kidonyo kwede i Ot. Gin conu guloko ngegi ikom Ot pa Rwot, kun nyimgi okemo tung kunyango, gitye kunu karyebe piny me woro ceng matye katuc ki tung kunyango. 17Ci en openya ni, “Wod pa dano, dong ineno gin man? Man mono jo me ot pa Juda gineno ni lok matidi ki botgi ka gibedo katimo gin me kwer kany? Itamoni gin myero gubed kamiyo tim bwami omede onya i lobo, kun gibedo kangeto cwinya jwi wek kiniga omaka doki aye? Nen kong kit macalo gitye kanywara kwede i yo marac ma okato kare. 18Pimeno, abitimogi malit ikare me akemona; dok pe abiparo pirgi bene, ki kica pe bimaka ikomgi. Kadi bed gukok bota kun gilego lega ki dwon malongo, ento pe abiwinyo kokogi.”