Ejekiel 7

Kare me agiki pa Icrael dong cok

1Rwot oloko kweda. 2En owaco ni, “Wod pa dano, an a Rwot Lubanga dong awaco bot lobo pa jo Icrael kuman ni, agiki! Agiki dong obino woko ikom twok lobo angwen ducu.

3Wun jo Icrael, agiki dong obino woko ikomwu; abitoyo kinigana woko ikomwu, pien abingolokop ikomwu kun poro kit gin ma wun wutimo. Dok bene abiketo can ikomwu pi gin me kwer ducu ma wutimo. 4Pe dong abiparo pirwu, kica dong pe bimaka ikomwu. Ento abiketo can ikomwu pi kit gin ducu ma wutimo, gin me kwer ma wumede ki timogini. Meno dong bimiyo wungeyo ni an aye a Rwot.”

5Rwot Lubanga owaco kuman ni, “Can me topaco bibino ikomwu kun lube aluba inge lawote cutcut. 6Agiki dong obino, dong oo; dong otyeko core woko ikomwu. Nen, tye kabino. 7Agiki man bino pirwu wun jo ma wubedo i lobo man; kare bene dong oromo, nino me woo me lweny dong cok, pe nino me yomcwiny ma wuwo kwede i wang jogi matye iwi godi. 8Kombedi dong acok toyo akemona woko ikomwu, kun atoyo kinigana ikomwu, dok bene abingolokop ikomwu kun lubu kit gin ducu ma wutimo. Abiketo can ikomwu pi gin me kwer ducu ma wutimo. 9Pe dong abiparo pirwu, kica dong pe bimaka ikomwu. Ento abiketo can ikomwu pi kit gin ducu ma wutimo, gin me kwer ma wumede ki timogini. Meno dong bimiyo wungeyo ni an aye a Rwot, ma apwodowuni.

10Nen, nino tye kabino! Topinywu dong obino woko. Tim bwami tye kamede ameda, ki wake bene dong omede adada. 11Tim bwami dong onya omede odoko odoo me tim maracu; dong ngat mo bene pe bidong ki ikin lutim maracu, kadi wa jami mabup ma gitye kwede, nyo lonyogi; dok bene dano mo madit pe dok bibedo tye ikin gi. 12Kare dong oo, nino dong onyiko cok. Lawil jami myero cwinye pe obed yom, kadi lacat jami bene pe myero obed ki kumu, pien akemo pa Lubanga bipoto ikomgi ducu maromrom. 13Lacatwil dong pe bitwero dwoko jami mayam en ocatoni cen bote, ma nongo en pud tye kwo. Pien akemo pa Lubanga bipoto ikomgi lwak ki ducu maromrom, ma pe bidok cen; dong ngat ma bigwoko kwone ki ikin gi bibedo peke pien gin ducu gubalo.

14Gukutu tum, ci gin ducu dong gitye kayube. Ento ngat mo pe ma cito ka lweny, pien akemo pa Rwot opoto ikomgi lwak ki ducu maromrom.

Pwod ikom Icrael pi balgi

15Lweny tye woko idye gudu, two gemo ki kec tye i ot. Ngat matye i tim kibineko woko ki pala lucwan; ki ngat matye i taun madit, kec ki two gemo bineko woko. 16Jo mogo ma gubwot gibilaro wi godi calo akuri me nota, ma gin ducu gibicur pi balgi. 17Ci cing dano acel acel bidoko goro, ki conggi bene bimyel amyela calo pii ma milamila limakmak. 18Gibiruku bongo cola i pyergi, ki lworo madwong bimakogi; lewic bimakogi ducu, gin ducu kibilyelo wigi woko. 19Gibibolo ryalgi ki jabugi woko idye gudu macalo gin ma pe leng, pien ryal ki jabu pe twero larogi inino ma Rwot bionyo iye kinigane ikomgi. Pe gibitiyo kwede me cobo mitigi, dok bene pe gibimiyo igi yeng kwede. Ryal ki jabu aye gire omiyo gupoto i bal. 20Yam onongo gubedo kawake pi ginarukagi me deyo ma giruku pi nyutu ditogi mamwani, dok gutiyo kwede me yubu cal lubangagi me kwer ma giracu atikani. Meno aye gin ma omiyo Rwot biloko lonyogi doko gin ma pe leng botgi.

21Abimiyo lurok yakogi woko, ci dok abimiyo lutim maracu matye i lobo yako jamigi ki lonyogi woko bene liweng, ci gibipyedo jamigi woko bene. 22Abiloko wanga cen pe abinenogi, wek gin gigi gupyed kabedona maleng tutwali, luyak bene gibidonyo iye ci gipyedone woko.

23Wuyub nyor me tweyowu. Lobo dong opong ki nek ki taunwu maditonegu ducu opong ki tim bwami. 24Abikelo rok ma giracu makato ducu kany me leyo odigi, ki me bedo iye. Abigiko tek me wakegi woko ki i kabedogi maleng gu ducu ma gibipyedoni woko. 25Ka remcwiny dong obino, ci gibiyenyo kuc, ento pe gibimedo ki nongone wa ki acel. 26Can me topaco bibino ikomgi, kun lube aluba inge lawote cutcut, ki lok anii bene bilubu lawote. Gibiyenyo ginanyuta ki bot lunebi kwe; ajwaki dong pe gibibedo ki kit gin mo ma myero gupwony ki dano, ki ludongo bene pe gibibedo ki tam mo ma myero gumi bot dano. 27Ci rwot bikumu, ki gen pa laker bene birwenyo woko, ki lwak bene komgi bimyel pi lworo madwong. Ci abitimogi kun lubu kit timgi, ci abingolokop ikomgi kun lubu kit ma gin kikomgi gingolo kwede kop ikom jo mukene. Man bimiyo gingeyo ni an aye a Rwot.”