Ejekiel 6

Rwot ojuku jone me woro cal jogi

1Rwot ceng oloko kweda. 2En owaco ni, “Wod pa dano, cik wangi inen godi me Icrael, ci itit loka botgi. 3Wac bot godi me Icrael ni guwiny lok pa Rwot Lubanga Matwero ducu, wek guwiny lok ma an Rwot Lubanga Matwero ducu atye kawacone bot godi, ki ceregu, ki lung matut, ki notagu ducu: nen, abikelo lweny ma kilwenyo i komwu ki pala lucwan, dok bene abijwero wang jogiwu woko liweng. 4Abimuku keno tyerwu woko, ki keno tyer kama wuwango iye odok ecetani bene abimukugi woko. Lutuwu jo Icrael ma gitye kunu kibinekogi woko inyim cal jogiwu. 5Abimiyo kom jo Icrael ma otoni rade inyim cal jogigi; dok abimiyo kikeyo cogogi rumu ki keno tyergi woko. 6I kabedo ducu ma wubibedo iye ki taunwu ducu kibijwero woko dong obur, ki wang jogiwu ducu kibimuku woko, ki keno tyerwu ducu kibimuku woko, ki cal jogiwu ducu kibitongo kibalogi woko, ki keno tyer me wango odok eceta bene kibitongo kireto woko piny, ki gin ducu ma wutiyo dong kibijwerogi woko liweng. 7Dok jo ma kinekogi komgi birade ata, ci man miyo wun wubingeyo ni an aye a Rwot.

8Ento abimiyo jo mukene gibwot ki i lak to ci gibedo kwo. Ka dong jo mogo ma gubwot gibibedo ikin lurok, dok ka kikeyowu woko i rok ducu, 9ci dong lutuwu ma gubwot gibipo ikoma ki ikin lurok kama onongo kiterogi iye i opii. Ci gibipo ikoma ki kunu kun gingeyo ni yam aketo can ikomgi wek amii lewic omakgi, pi cwinygi ma gen pe iyeni ma onongo dong oa woko ki ikoma pi tim tarwanggi, omiyo gumaro woro cal jogi makato an. Gibibedo ki kec cwiny ikomgi keken gi pi gin maracu me lewic ma gutimoni, ki pi gin me kwer ducu mayam gutimo. 10Dong gibingeyo ni an aye a Rwot; dok lok mayam aloko ni abitimo gin marac man ikomgini onongo pe aloko me nono.”

11Rwot Lubanga Matwero ducu owaco kuman ni, “Wudong korwu ki cingwu, kun wunyono tyenwu bene i ngom ka wukok kun wuwaco ni can madit dong opoto! Can man opoto pi bal me gin me kwer ma jo me ot pa Icrael gutimo. Pimeno, kibinekogi woko i lweny, kec ki two gemo bene binekogi woko. 12Jo ma gitye kamabor two gemo aye ma binekogi; ki jo matye cok kibinekogi woko ki pala lucwan; ki jo ma odong ma gubwot ki ilak to, kec aye ma binekogi. Meno en aye kit macalo abitoyo kwede akecana ikomgi. 13Kom jo ma oto birade lirat ikin cal jogi ki ikabedo ducu ma orumu keno tyergi, wa iwi ceregu ducu, ki iwi godi mabocogu, ite yadi ducu ma potgi oluk, ki ite yat kworo ma pote oluk, ki ikabedo ducu kama kityero iye gin ma ngwece kur me woro cal jogigi. Ci gin ducu dong gibingeyo ni an aye a Rwot. 14Abiryeyo cinga woko ikomgi, ci abibalo lobogi woko, amiyo iye dong nono, ikabedo ducu kama gibedo iye, cake ki i tim nio kwede wa i Ribla. Ci gin ducu dong gibingeyo ni an aye a Rwot.”