Ejekiel 5

Ejekiel olyelo yer wiye ki yer tike woko

1Lubanga owaco ni, “Wod pa dano, kwany pala lucwan mabit ci itii kwede macalo lyedi pa lalyel wic, ci ilyel ki yer wii wa ki yer tiki bene; ka dong ikwany lapim, ci ipok yere woko i dul adek. 2Dul me adekeni ibiwangone woko i mac idye taun madit, kun iporo ki kare ma nongo mony dong orumu taun madit otum. Kwany dul me adek mukene ci itong woko ki pala lucwani ikare ma nongo iwoto irumu taun madit. Dong dul me adeke ma odongi kwany ibol i yamo ci an abilwenyo ikome ki pala lucwana. 3Gwok yer mogo ci itwe woko i dog bongoni. 4Dok ikwany yer mogo ki ikom yer ma onongo igwokoni, ci ibol woko i mac, wek owang woko. Dong mac bia ki ikom yer man ci nya o kwede wa ikom ot pa Icrael.”

5Rwot Lubanga Matwero ducu owaco kuman ni, “Man aye Jerucalem; ma dong atyeko keto en icwiny lobo me rok ducu, kun lobo mapol pa lurok orume woko dyere. 6Ento Jerucalem ojemo woko ikom gin ma an aciko, ci oloke katimo gin maracu atika makato rok mukenegu ducu. Gin gubedo jo ma oding ma pe gilubu cika makato rok mukene mayam gurumu en dyeregu ducu. Jo Jerucalem gukwero tiyo gin ma an aciko, ci gukwero bene lubu cika. 7Ma omiyo an Rwot Lubanga Matwero ducu owaco kuman ni, wun aye dong rok ma luyela makato lurok ma gurumuwu dyereni, en gin ma omiyo pe wuye lubu cika ducu ma aketo, dok bene pe wugwoko gin ma an aciko, ento wun dok wubedo kalubu cik pa rok mukene ma gurumuwu. 8Dong pimeno, an Rwot Lubanga Matwero ducu atito botwu ni abingolokop ikomwu ma lwak me rok ducu gineno. 9Dong pi gin me kwer ducu madong wutyeko timone, abitimo gin mayam pud peya atimo ikomwu, en lakit gin acelu ma pe dok abitimo. 101Dong adwogine aye bibedo ni wegi lutino ma i Jerucalem gibicamo lutinogi woko, ki lutino bene gibicamo wegigi woko ki i dyewu. Dok bene abingolokop ikomwu acobo kakare, ci dong jo mogo ki ikinwu ma gibidong gibedo kwo, ci abikeyogi woko ata. 11Pimeno, kit macalo an Lubanga makwoni, man lok pa Rwot Lubanga Matwero ducu, adada, pien dong wubalo kabedona maleng woko ki tim me kwerwugu ducu, ki gin ducu ma obedo cilo ma cwinya dagi, pimeno abinekowu woko, pe dong abinenowu ki wang maber, dok bene kica pe bimaka i komwu wa ki acel. 12Dul me adek pa lwak mewu, two gemo ki kec aye binekogi woko idye taun madit; ki dul me adek mukene kibinekogi woko ki pala lucwan inge taun madit; ki dong dul me adek mudongeni abikeyo woko ata, dong abiwoto pala lucwana aye aryemogi kwede.

13Ci kinigana bitum gire kene kitmeno, dong abitoyo akecana ikomgi ka dong cwinya bikwe. Ka man otime gibingeyo ni an a Rwot, dong aloko ki nyeko, ikare ma atoyo akecana ikomgi. 14Dong makato ducu abiweko pacowu dong obur ki wun wubibedo ginacaya ikin lurok ducu ma gurumuwu dyere ki bot jo ducu ma gikato ki kanget pacowu ma odong oburri.

15Ikare ma abingolokop i komwu ma nongo kiniga omaka ki akeca, abiketo can magwa i komwu. Rok ducu ma gurumuwu gibibedo ki lworo madwong. Gibicayowu kun giloko lok agec ikomwu ci wubibedo lanen me pwonyogi. 16Abijuku kit cam ducu mayam wunongoni pe dong binen, man bimiyo kec nekowu matek. Wubiwinyo arem me kec matek mada calo atero ma lake bit ma kicelo i komwu wek otyekwu woko. 172Abicwalo kec ki nguugu me neko wun ki lutinowu woko, dok bene abicwalo two gemo ki tim bwami ki lweny me nekowu me tyekowu woko. An Rwot dong aloko.”