Ejekiel 4

Ejekiel ogoyo cal Jerucalem ma mony oriko woko

1Lubanga dok owaca ni, “Dong in, wod pa dano, kwany matapwali iket inyimi, ci igo cal taun madit man ikome, ci igor cal Jerucalem kikome. 2Ci irume woko dyere, dok itor cel lobo orum woko dyere; ka iket gony dok orum woko bene, ci iket yadi latwom cel orum woko bene. 3Dok ikwany caniya nyonyo ci iket obed macalo cel nyonyo ikin in ki taun madit man me Jerucalem, kun wangi kemo taun madit man. Ma bedo calo mony dong orumu taun madit man woko liweng. Macalo in aye ma dong ityeko rumu taun madit man woko pi lweny ikome. Man aye lanyut pi ot pa jo Icrael.

4Dok ibut ma lakngeti ma lacam odok piny, ci dong abiketo can me bal me ot pa Icraeli ikomi. Pi nino acel acel ma ibutu kwede ibitingo balgi, 5pi nino miya adek ki pyere abongwen, marom ki wel mwaka me can ma meggi. Ci in bene ibitingo can me ot pa Icrael pi kare marom meno. 6Ka dong ityeko tiyo meno, ibibutu piny doki pi tyen me aryone, ki lakngeti ma lacuc, ci ibitingo can me ot pa jo Juda; abimini nino pyere angwen, ma nino acel acel rom ki mwaka acel. 7Ci ibiciko wangi ineno Jerucalem ma kirumu wokoni, kun itito lok me bura ki lok me nebi ikom taun madit man. 8Ci abitweyi woko ki tol ma pe dong ibitwero loke tungi ki tungi nio ka ityeko nino ma kirumu iye taun me Jerucalem woko dyereni liweng.

9Kombedi dong ikwany ngano, cayiri, muranga, ngor, gaya ki kal. Rubgi ducu kacel ci ited ki mugati. Meno aye cam ma in ibicamo pi nino miya adek ki pyere abongwen ma nongo itye ka butu ki lakngeti ma lacami. 10Cam ma ibicamo kibipimo apima, maromo gram miya aryo ki pyere adek pi nino acel acel, dok bene inino acel acel ibicamo cam kicel. 11Pii ma imato bene kibipimo boti apima, kikopo aryo inino acel acel, dok ibimato kicel keken. 12Ibimoko mac i cet pa dano ma otwo ki inyimgi, ci ibitedo mugati macalo capat ka dong icamo.” 13Dok Rwot owaco kuman ni, “Ka aryemo jo Icrael akeyogi woko ikin rok ducu, ci man aye kit macalo gibicamo kwede cam ma cik okwero ni pe gucam.” 14Cutcut agamo ni, “Pe kumeno Rwot Lubanga Matwero ducu! An peya abalo koma kekena ki gin me kwer. Cake i ka tinona nio kwede wa onyo peya acamo ringo lee mo ma oto kene nyo ma nguu aye okayo oneko. Pud peya acamo kit ringo lee mo ma kitamo ni obedo me kwer.” 15Ci Lubanga dok owaco ni, “Nen, dong abimiyi cet dyang aye ma ka cet dano en aye itwero tedo iye mugatini.”

16Dok omede ki lok kun waco ni, “Wod pa dano, nen, abijuku kit cam ducu woko dong pe binen i Jerucalem. Gibicamo mugati ma gipimo apima kun gicamo ki lworo; ki pii bene ma gimato gibipimo apima, gimato ma nongo cwinygi obale woko. 17Abitimo man wek pe dong gunong mugati ki pii ma oromo, wek dano acel acel obed kaneno lawote ma nongo cwinygi obale woko, wek komgi oloc woko i cangini.”