Ejekiel 3

11

Lubanga dok owaca ni, “Wod pa dano, cam gin ma dong kimiyi; cam buk adola man, ci icit ilok bot jo me ot pa Icrael.” 2Kitmeno angamo doga, ci en omiya buk adola ni acam. 3Kadok owaca ni, “Wod pa dano, cam buk adola man ma amiyo botini, nio ka iyeng woko kwede ma ii odeng.” Ci acamo; anongo buke obedo lim mada ki idoga calo moo kic.

4Ci Lubanga dok owaca ni, “Wod pa dano, cit io bot jo me ot pa Icrael ci itit botgi gin ducu ma atye ka wacini. 5Pe atye kacwalo in ni icit i rok mo ma jone loko leb mo ma niang iye tek, ento abicwalo in bot jo me ot pa Icrael. 6Kace onongo acwalo in bot rok mogo ma jone loko leb matek mapatpat ma in pe iniang iye, ci kono guwinyo lok ducu ma ibiwaco botgi. 7Ento jo me ot pa Icrael pe gibiwinyo loki, dok bene pe gibiwinyo loka. Pien gin ducu jo ma ngutgi nwang dok wigi tek. 8Nen, kombedi dong abimiyo nguti doko nwang calo ngutgi ki wii bene bedo tek calo wigi. 9Abimiyo wi bedo tek calo meggi; ci pe ibilworogi, pe bene ilwor kit wang ma gineni kwede, pien gin jo ma lujemo.”

10Ci Lubanga omede ki loke kun waco bota ni, “Wod pa dano, lok ducu ma abiwaci myero igam obed icwinyi, dok iwinygi bene maber. 11Ka dong ia icit bot jo ma gitye i opii, cit bot lutuwu kikome, ci iwac botgi kadi giwinyo nyo gikwero winyone.”

12Ka Cwiny pa Lubanga otinga woko malo, ci awinyo dwon ki tung kungeya ma mor matek calo oyengyeng ma yengo piny, kun dange ni, “Kipak deyo pa Rwot i kabedone!” 13Awinyo bwom lee magi ka gitye kagone kacel i yamo, ki koko pa lawala bene mor matek calo oyengyeng ma yengo piny. 14Ikare ma Cwiny pa Lubanga oila malo otera woko, ci abedo ki keco icwinya, kiniga bene omaka woko, ci acito ma dong onongo teko pa Rwot odiya matek mada. 15Acito i Tel Abib, kama onongo jo ma kiterogi i opii gibedo iye, inget kulu Kebar. Abedo kunu ikin gi pi nino abiro kun atye ki ur madit atikatika pi gin ma onongo aneno otime ikoma ca.

Lubanga ociko Ejekiel ni obed lakurpiny

(Eje 33:1-9)

16Lacen inge nino abironu Rwot oloko kweda. 17En owaco ni, “Wod pa dano, dong aketi me bedo lakurpiny pi rok me Icrael. Ibitito botgi lok ducu ma acikogi kwede ma an awaci. 18Kace awaco ni dano ma latim marac bito ada, ento kun in pe ijuku en ma icike ni oloke owek timo gin marac, wek olar kwone, en bito i baleni; ento alii me tone abidwoko iwii. 19Ento kace onongo ijuku en latim marac meno, kun icike ni owek yo me tim maracu, ka pe oloke oweko timo gin maracu, nyo yo me tim maracuneni, en bito i balenu; ento nongo in giri ilaro kwoni. 20Dok bene kace dano ma kite atir oloke woko oweko timo gin matye atir, ce otimo bal, ce an aketo ariya mo inyime, ci en bito, pien onongo in pe ijuke, en bito pi bale, ki tic ma atir mayam en otiyo pe dong abipo pire; ento alii me tone abidwoko iwii. 21Dok bene kace ijuku dano ma kite atir ni pe otim bal, ka en owinyo loki pe otimo bal, ci adada en bibedo kwo, pien owinyo lok ma ijuke kwede; ci in bene ibilaro kwoni.”

Lanebi Ejekiel pe bitwero lok

22Rwot oketo cinge i koma; ci owaca ni, “A malo, ci icit idye bar, an abilok kwedi ki kunu.” 23Ci a malo acito idye bar, ci aneno deyo pa Rwot ocung kunu marom ki deyo ma akwongo nenone inget kulu Kebar; ci cutcut aryebe woko piny wa i ngom. 24Ento Cwiny pa Rwot odonyo ikoma, ci ociba acung ki tyena; ci oloko kweda kun waco ni, “Cit paco, ci ilor wii woko i odi. 25Ci in wod pa dano, kibitweyi woko ki tol, man bimiyo pe itwero cito woko ikin dano. 26Dok abimiyo te lebi dwale woko, wek ibed ladogeoto ma pe dong itwero juku dano; pien gin jo ma lujemo. 27Ento kace dok aloko kwedi, ci abiyabo dogi, ci in ibiwaco botgi lok ma an Rwot Lubanga atye kawaco. Ngat ma biwinyo lok man wek owiny, ki ngat ma kwero winyo lok man wek en okwer; pien gin jo ma lujemo.”