Ejekiel 2

1Ngat ma onongo tye kaloki owaco bota ni, “Wod pa dano, a icung, ci abilok kwedi.” 2Ikare matye kalok kweda, Cwiny pa Lubanga odonyo i iya ci omiyo acung; pud awinyo en omede kun loko kweda ni, 3“Wod pa dano, abicwalo in ibicito bot jo Icrael, ma lujemo ma gin gujemo ikoma, ci guloke ka lweny ikomani. Gin pud lujemo wa onyo kit macalo yam kwarigi gujemo ci gutimo bal ikomani. 4Gin aye jo ma kitgi obedo acak dok ngutgi bene nwang ma pe guwora. Abicwalo in me tito botgi gin ma an Rwot Lubanga abiwaco botgi. 5Ka gibiwinyo loki nyo gikwero winyone, (pien gin jo ma lujemo) ento kadi bed kumeno gibingeyo ni lanebi yam obedo ikin gi. 6Dong in wod pa dano, pe myero ilworgi, pe bene ilwor lok ma gin waco. Gibirumi woko macalo okutu lango ma orumi, kun ibedo iwi oton mapol; ci pe ilwor lokgi, cwinyi bene pe myero obale kadi gineni ki wang marac, pien gin jo ma lujemo. 7Ibiloko loka botgi, kadi ka giwinyo nyo gikwero winyone; pien gin jo ma lujemo.

8Ento in, wod pa dano, winy gin ma an awaco boti; pe ibed lajemo calo jo meno ma lujemo. Ngam dogi ci icam gin ma abimiyo boti me acama.” 91Ikare ma aneno piny, ci aneno cing mo ma kiryeyo tung bota; ci nen onongo omako buk adola ma kicoyo iye coc. 10Ci oyaro buk adola inyima, ci aneno kicoyo ryoryo ducu, i iye ki tung i ngeye bene. Lok ma kicoyo iye onongo obedo lok me koko me can, kumu ki aroma me can.