Ejekiel 1

Ginanyuta mukwongo ma Ejekiel oneno ikom Lubanga

1:1—7:27

Komker pa Lubanga

11

Inino dwe abic me dwe me angwen i mwaka pyere adeke, an onongo atye abedo kacel ki Lujudaya ma gin opii inget kulu Kebar i lobo Babilon. Ci aneno polo oyabe, cutcut atugi neno Lubanga i ginanyuta. 22Man otime inino dwe abic i mwaka me abice cake ma kitero rwot Yekoyakin kwede i opii. 3Ikare ma atye i lobo pa jo Kaldaya inget kulu Kebar, an Ejekiel wod pa ajwaka Buji, awinyo ka Rwot loko kwede ci tekone obino ikoma.

4Ikare ma aneno piny, ci aneno yamo matye ma kodo mager oa ki i lobo matye tung kumalo, kacel ki pol madit ma lutkot onongo tye kawil ki iye, kun mac bedo kalyel teretere iye calo nyonyo ma kibuku. I dye mace onongo tye iye gin maryeny macalo mola. 53Dong idye yamo matye ma kodo mageri, aneno gin mo manen calo lee makwo angwen, ma gubedo calo dano, 6ento lee acel acel ikin gi onongo tur nyime tye angwen, dok bene lee acel acel bwome onongo tye angwen. 7Tyen gi ocung atir, ki dye tyen gi onongo nen calo dye tyen obong twon dyang, ma giryeny calo mola ma kijwayo maleng. 8Ite bwomgi angweni onongo tye iye cing angwen macalo cing dano. Dong gin lee angweni onongo yam tur nyimgi ki bwomgi tye kit man: 9bwomgi okube ogudu lawotgi, kun lee acel acel cito ma okemo nyime atir, giwoto ma kun pe giloke kamo. 104Kit macalo tur nyimgi nen kwede, lee acel acel onongo tur nyime tye angwen mapatpat: ki tung inyime wange nen calo wang dano; ki tung lacuc wange nen calo wang labwor, ki tung lacam wange nen calo wang twon, ci dong ki tung ingeye wange nen calo wang ocur. 11Tur nyimgi yam obedo kitmeno. Lee acel acel bwome tye aryo ma onongo oyare dok otinge malo kun ogudu wi bwom lee lawote mukene macok kwede, ki bwomgi aryo mukene oumu komgi woko. 12Lee acel acel woto kemo nyime atir, kama cwinygi onongo omito ni gucit iye, giwoto ma kun pe giloke kamo. 13Ikin lee makwoni onongo yam tye iye gin ma lyel calo miri mac, ma obedo calo mac ma wire ikin lee makwo, mace onongo lyel maleng, ki lutkot bene obedo ka wil ki idye mac kunu. 14Lee magi bene onongo gitye kawire gidok tungi ki tungi calo mil pa lutkot. 155

Ikare ma aneno lee magi angwen, aneno lawala angwen ma gudu ngom, lawala acel acel ocung inget lee acel acel bene. 16Lawala acel acel onongo ryeny calo kidi me wel, ci gin lawala angwen ni ducu ginen maromrom. Kit ma kitiyogi kwede nen calo lawala acel acel kirwako odonyo i i lawala mukene. 17Ka dong gucako wot, gucito kama gukemo i yoo angwen mapatpat ma pe giloke kamo. 186Gin Lawala angwen magi yam doggi tye, ciliki bene onongo tye ikomgi, kun wang mapol orumu doggi woko ducu litit. 19Ka inen lee makwoni giwoto gicito anyim, ci lawala magi bene giwoto kacel kwedgi, kace inen lee gua malo ki i ngom, ci lawala bene gitinge kwede malo. 20Kama cwiny mito ni gucit iye, gin bene gicito iye, ci lawala bene gitinge malo gicito kacel kwedgi; pien onongo cwiny lee angweni tye i i lawala ducu. 21Ka lee tye kawot, nyo ka gucung woko, dok ka gua malo, ci lawala angweni bene gitimo kitmeno, pien cwiny leegu tye i igi mamiyo gitimo kumeno. 227

Ki malo ka wi lee magi makwoni onongo kiriyo iye gin mo manen calo pete me polo, maryeny aryenya calo pee, kun opete lamalo ka wigi. 23Ite pete meno onongo guyaro iye bwomgi, kun bwomgi acel acel gukeme ki luwotgi; ki lee acel acel onongo tye ki bwome aryo me umu kome woko. 248Awinyo bwomgi ka nguru ikare ma gitye katuk, bwomgi mor calo mor pa pii ma core, macalo mor pa Won Twer Ducu, ki dok macalo woo madwong pa dwon jo me mony madit; ki ka gucung mot, ci giumu bwomgi woko. 25Ci dwon owinye kun oa ki malo inge pete ma oriine malo ka wigini; ikare ma onongo gucung mot, guumu bwomgi woko. 269

Malo iwi pete matye ka wigini onongo tye iye gin mo calo komker, manen calo got capir ma bulu; dong gin ma nen calo danoni aye obedo iwi gin manen calo komker meno. 2710Gin meno ma obedo calo danoni onongo tye karyeny calo mola ocake ki i pyere odok kwede malo, manen calo mac ma omoko orumu kome woko ducu; cake ki i tung pyere dok kwede piny, onongo nen calo mac, mace bene onongo tye kalyel orume woko dyere. 28Nen calo danyu manen ikom pol ka inino me kot, mac mayam obedo kalyel ma orume dyereni bene obedo kitmeno. Meno aye kit mayam cal me deyo pa Rwot nen kwede.

Lubanga olwongo Ejekiel me bedo lanebi

Ikare ma aneno ci atugi poto woko piny aryeba ic, cutcut awinyo dwon ngat mo matye kalok.