Koko 5

Lega pi kica

1Ai Rwot, kong ipo ikom gin ma opoto ikomwani;

cik wangi inen lewic ma watye kwede!

2Kiloko gipinywa dong odoko pa jo mukene;

ki gangiwa gudoko pa lurok.

3Wan dong waloke wadoko calo lutino kic,

ma wegigi peke;

megiwa dong gudoko calo mon to.

4Myero wawil pii ma wamatoni awila ki lim,

yen me tedo bene omyero wawil awila.

5Kiryemowa woko ki tek kun bene watye ki okol i ngutwa;

komwa bene oloc woko,

kun bene pe kimiyowa kare me yweyo.

6Wamoko gicike ki jo Ejipt ki jo Aciria,

wek wabed kwo

ki wek gumiwa cam maromowa.

7Kwariwa yam gubalo; ci guto woko,

ci balgi aye ma dong okelo can ikomwa.

8Opii aye ma dong giloyowa;

ngat mo peke ma myero olarwa ki i cinggi.

9Wadyero komwa pi nongo cam,

ma nongo wawok ki i lak pala lucwan idye tim.

10Del komwa dong odoko lyet calo keno

pi lyeto me kec matye kanekowa.

11Kimako mon i Cion ci kibutu kwedgi tektek,

wa ki anyira ma pud girini kibutu kwedgi tektek igangi ducu ma Juda.

12Kiguro luker woko ikom yat ki cinggi;

woro mo ma kimiyo bot ludongo dong peke.

13Kidiyo lutino awobe tektek me rego kal

awobe gicato ki yen mapek ma guyeyo iwi gwokgi.

14Co ma oteggi pe dong gigure i dog gang,

awobe bene pe dong gigoyo wer.

15Gin mayam yomo cwinywa dong ogik woko;

myel mayam wamyeloni dong oloke odoko kumu.

16Lalukana dong opoto woko piny ki iwiwa.

Ci waneno can, pien wabalo!

17Pi lok man omiyo cwinywa dong odoko goro,

pi jami magi omiyo wangwa bene dong ocido woko.

18Got Cion ma dong odong oburri;

too aye ma dong gitye kawot iwiye.

19Ento in, ai Rwot, ibedo i loc nakanaka;

komkeri bedo nakanaka ikare pa yalwak ducu.

20Pingo wii wil woko ikomwa,

ibwotowa woko liyak pi kare marom man pingo?

21Dwokwa boti, ai Rwot, ci wek wadwogi!

Roc kare me bedowa odok manyen kit macalo yam tye con ca!

22Dong ikwerowa woko matwal ce?

Kinigani dong agikine peke ce?