Koko 4

Gin ma otime inge poto pa Jerucalem

1Jabu ma mili dong ocido woko licuc,

jabu ma yam kiliyo maberi dong kite oloke woko!

Godi me Ot maleng guket woko piny atata;

guromo yoo woko ducu.

2Awobe Cion

onongo yam gubedo me wel calo jabu mapek mabeco;

ento kombedi dong kinenogi calo agulu mamwa ma kicweyo ki lobo!

3Kadi too bene miyo tunune wek lutino gudot cake;

ento jona dong gudoko ger ikom lutinogi,

calo udu ma gibedo i tim.

4Leb latin lakere maromo dot

omoko woko i dane pien doge otwo woko ki orwo pii;

lutino tye kalego cam,

ento ngat mo mamiyo botgi peke.

5Jo mayam camo cam mabeco,

gitye kato woko liweng idye gudo;

jo mayam gitye ki kwo maber i ot pa luker,

dong giyenyo cam iwi odur. 61

Can ma kiketo ikom jo tuwa,

dit makato can ma kiketo ikom jo Codom woko,

mayam kireto woko piny oyotoyot iwang cawa mo manok keken,

ikare ma Lubanga oketo cinge ikome.

7Rwodine yam komgi leng makato pee woko,

dok komgi tar makato cak;

komgi yam kwar makato gweng makwar me wel,

yam ginen beco calo kidi capir ma olil mapwoti.

8Ento kombedi wanggi ocido woko licuc makato cuk bilo,

dong dano bene pe ngeyogi ka giwok ki i gudo;

komgi ojony woko lingok ikom cogogi,

dok komgi otwo woko matek calo yen ma otwo.

9Jo ma kinekogi ki pala lucwan komgi gum

makato jo ma kec aye tye ka nekogi,

ma gujony lingok ma komgi odong geng nono,

pien cam mo peke ma ocek i poto. 102

Mon ma lukica ma gimaro lutinogi

aye dong gutedo kom lutinogi ki komgi;

ci lutinogi odoko camgi

ikare ma kityeko iye lutuwa.

11Rwot dong omiyo akemone olyeti woko marac,

ci ocoro kinigane malyet ikom Cion.

Ci omoko mac i Cion,

ma owango te gutine otyeko woko liweng.

12Luker me lobo bene yam pe guye,

nyo kadi ngat mo ikin jo ma bedo iwi lobo,

ni lumerok nyo lukwor twero donyo i dog cel me Jerucalem.

13Man obedo pi bal pa lunebine ki pi bal pa ajwakine,

ma guneko jo ma kitgi atir woko idye taun.

14Gubedo kawot ata idye gudo calo lutowang,

gunyobo komgi woko ki remo,

omiyo gudoko gin me kwer ma dano dong dag gudo.

15Dano gidange ikomgi kun giwaco ni, “Wulengwa yoo!

Wun jo ma komwu ki keni! Wuleng yoo! Wuleng yoo!

Pe wugud kwede komwa bene!”

Ci guringo gubwot woko gire, kun gubedo kamal ata ikin lurok,

ci jo ma i rok guwaco ni, “Pe dong gibibedo kacel kwedwa kany wa ki acel.”

16Rwot kikome aye ma dong okeyogi woko,

dok pe dong biparo pirgi matwal;

deyo mo ma kimiyo bot ajwaki bene obedo peke,

gin mo maber ma gutimo bot ludongo peke.

17Wangwa ocike kaneno yoo

ento jo ma konyowa peke;

wabedo kakuru rok ma pe gitwero larowa.

18Lumerok dong gudingo korwa woko

omiyo pe dong watwero wot idye gudowa;

agikiwa onongo dong onyiko cok,

wel ninowa bene dong kikwano woko,

pien agikiwa dong oo.

19Jo ma guryemo korwa gidwir

ma gikato acut ma tuk cito malo,

gulubu korwa wa iwi godi;

dok gukane woko ka gukiyowa idye tim aroo.

20Ngat ma Rwot oyero,

ma pire tek botwa macalo kwowa,

kimako kitere woko i opii,

en mayam watamo ni bilarowa ki ikom lumerok.

21Wun jo Edom, wubed ki wake,

cwinywu bene obed yom,

wun ma wubedo i lobo Uj,

ento wubimato bene ki ikikopo me can;

wubimer woko ci wubilunyu bongiwu woko wudong munero.

22Wun jo Cion,

can ma kiketo ikomwu pi balwu dong ocobe kakare,

Rwot dong pe bigwokowu i opii matwal.

Ento wun jo Edom, Rwot biketo can ikomwu bene pi balwu,

ci en binyutu balwu woko ducu kamaleng.