Ejekiel 48

Poko lobo ikin kaka pa jo Icrael

1Magi aye nying kaka ducu me Icrael: cake ki iwang apoki lobo matye yo tung kumalo, kun a ki i Nam Mediterranean wok ki i taun madit me Ketlon cito kwede i yoo ma donyo i Kamat, nio kwede wa i taun madit me Kajar-enon (matye yo tung kumalo me wang apoki lobo me Damaciko ki yo tung malo ikom Kamat), kun mede kwede a ki tung kunyango dok kwede yo tung kupotoceng, kenyo kimiyo iye dul lobo acel bot Dan. 2Iwang lobo ma orwate ki lobo pa Dan, cake ki yo tung kunyango dok kwede yo tung kupotoceng, kimiyo iye dul lobo acel bot Acer. 3Iwang lobo ma orwate ki lobo pa Acer, cake ki yo tung kunyango dok kwede yo tung kupotoceng, kenyo kimiyo iye dul lobo acel bot Naputali. 4Iwang lobo ma orwate ki pa Naputali, cake ki yo tung kunyango dok kwede yo tung kupotoceng, kenyo kimiyo iye dul lobo acel bot Manace. 5Iwang lobo ma orwate ki lobo pa Manace, cake ki yo tung kunyango dok kwede yo tung kupotoceng, kenyo kimiyo iye dul lobo acel bot Epraim. 6Iwang lobo ma orwate ki Epraim, cake ki yo tung kunyango dok kwede yo tung kupotoceng, kenyo kimiyo iye dul lobo acel bot Reuben. 7Iwang lobo ma orwate ki lobo pa Reuben, cake ki yo tung kunyango dok kwede yo tung kupotoceng, kenyo kimiyo iye dul lobo acel bot Juda.

8Iwang lobo ma orwate ki lobo pa Juda, cake ki yo tung kunyango dok kwede yo tung kupotoceng, bibedo dul ma kipoko bedo pat ma lace romo mairo apar ki bore bibedo rom ki bor pa dul lobo ma dong kityeko pokogi bot jo me kaka pa Icraeli, cake ki yo tung kunyango dok kwede yo tung kupotoceng, kun nongo kabedo maleng tye idyere.

Lobo ma kipoko pi Rwot

9Lobo ma ibipoko bedo pat pi Rwoti bore bibedo mairo apar ki lace bibedo mairo aboro. 10Magi aye bibedo kit macalo gipoko kwede dul lobo maleng: ajwaki kibimiyo botgi dul lobo matye yo tung kumalo ma bore romo mairo apar, ki yo tung kupotoceng lace romo mairo angwen, ki yo tung kunyango bene lace romo mairo angwen, ki bore yo tung kupiny romo mairo apar, kun kabedo maleng pa Rwot tye idyere. 11Kabedo ducu ma orumu kabedo man malengi bibedo pa ajwaki ma gin likwayo pa Jadok. Gin gutiyo bota ki ada, pe gungak gubwota woko ikare ma jo Icrael gungak woko ca, kit macalo Lulevi gutimo. 12Dul lobo man bibedo botgi calo dul lobo ma kipoko ki ikom dul lobo maleng, ma en aye kabedo maleng makato ducu, ma orwate ki lobo pa Lulevi. 13Dong inget lobo pa ajwaki, kipoko iye dul lobo bot Lulevi, ma bore romo mairo apar ki lace mairo angwen. Bore ka kiribo ducu dong bedo mairo apar ki lace mairo aboro. 14Dul lobo ma kidyero bot Rwoti obedo dul maber makato ducu, pe tye mo ma kitwero cato nyo lokone ki gin mo, dok bene pe kitwero kobone bot larok mo. Pien man dul lobo maleng, ma dong odoko pa Rwot.

15Ento dul lobo mudong ma bore romo mairo apar ki lace mairo aryo, meno lwak ma gibedo i taun madit gibitic kwede kit me nino ducu; gitwero bedo iye dok bene gitwero weko mukene bedo macalo bar. Gang bibedo idyere, 16dok bibedo latwoke angwen ma bocogi romrom ma twoke acel acel bore romo mita alip aryo ki miya aryo ki pyere abic. 17I kabedo ducu murumu taun madit itwoke acel acel, bar bibedo tye iye ma bore ari romo mita miya acel ki pyere aryo wiye abic. 18Dul lobo ma odonge ma orabo nget dul lobo maleng, bore bibedo mairo angwen tung kunyango, ki mairo angwen yo tung kupotoceng. Ci cam ducu ma bicek iye bibedo cam pa lutic ma gitiyo i taun madit. 19Lutic ducu ma gitiyo i taun madit, ma gua ki i kaka ducu pa Icrael, gibipuru lobo meno. 20Dul lobo ma ibipoko bedo pat bibedo latwoke angwen, ma bor pa twoke acel acel bibedo mairo apar; meno nongo oribo dul lobo maleng wa ki lobo pa jo ma gibedo i taun madit.

Lobo ma kipoko pi laker

21Lobo ma odong inget dul lobo maleng ki lobo pa jo ma gibedo i taun madit en aye lobo ma odong tungi ki tungi inget dul lobo ma latwoke angwen ma bore ki lace romo mairo apar, bibedo pa laloc. Wang apokine bibedo wang apoki me lobo kikome tung kunyango ki tung kupotoceng. Dul lobo malengi, ki kabedo maleng ma i Ot pa Lubanga matye i dyereni, 22ki lobo pa Lulevi kacel ki lobo pa jo ma gibedo i taun madit meno ducu, bibedo idye lobo ma dong kipoko me bedo pa laloc. Lobo pa laloc bibedo ikin dul lobo ma kipoko bot kaka, kun wang lobo pa jo Juda tye tung kumalo ki wang lobo pa jo Benjamin nongo tye yo tung kupiny.

Lobo pa kaka mukene

23Dong poko dul lobo bot kaka mudonge tye kit man: cake ki yo tung kunyango nio kwede yo tung kupotoceng, kenyo kipoko iye dul lobo acel bot Benjamin. 24Iwang lobo ma orwate ki lobo pa Benjamin, cake ki yo tung kunyango dok kwede yo tung kupotoceng, kenyo kimiyo iye dul lobo acel bot Cimeon. 25Iwang lobo ma orwate ki lobo pa Cimeon, cake ki yo tung kunyango dok kwede yo tung kupotoceng, kenyo gimiyo iye dul lobo acel bot Icakar. 26Iwang lobo ma orwate ki lobo pa Icakar, cake ki yo tung kunyango dok kwede yo tung kupotoceng, kenyo kimiyo iye dul lobo acel bot Jabulon. 27Iwang lobo ma orwate ki lobo pa Jabulon, cake ki yo tung kunyango dok kwede yo tung kupotoceng, kenyo kimiyo iye dul lobo acel bot Gad. 28Ka dong iwang lobo ma orwate ki lobo pa Gad, wang lobone biwoto kun cake ki i Tamar kawok ki i pii Meriba-kadec, kun wok kwede ki inget laora kulu me Ejipt cito o kwede i Nam Mediterranean.

29Man aye lobo ma ibipoko ikin kaka pa jo Icrael me bedo ginaleyagi, dong magi aye gin dul mapatpat ma kipoko. Man an Rwot Lubanga Matwero ducu ma awaco.

Dogcel me Jerucalem

301

Magi aye bibedo dogcel ma kibidonyo kwede i taun madit me Jerucalem. Itung kumalo kipimo romo mita alip aryo ki miya aryo ki pyere abic. 31Dok onongo tye iye dogcel adek, dogcel pa Reuben, dogcel pa Juda, ki dogcel pa Levi. Dogcel me taun madit onongo kicako nyinggi ki nying kaka pa Icrael. 32Itung kunyango bene onongo kipimo mita alip aryo ki miya aryo ki pyere abic. Onongo bene tye iye dogcel adek, dogcel pa Yucepu, dogcel pa Benjamin, ki dogcel pa Dan. 33Itung kupiny bene kipimo oromo mita alip aryo ki miya aryo ki pyere abic. Ci onongo tye iye dogcel adek, dogcel pa Cimeon, dogcel pa Icakar, ki dogcel pa Jabulon. 34Me agikine yo tung kupotoceng kipimo oromo mita alip aryo ki miya aryo ki pyere abic. Ki bene onongo tye iye dogcel adek, dogcel pa Gad, dogcel pa Acer, ki dogcel pa Naputali. 35Dong bor pa cel ma orumu taun maditi ducu onongo romo mita alip abongwen. Ci cake ikare man cito kwede anyim, nying taun maditi dong kibilwongo ni: Rwot Tye Kany.”