Ejekiel 47

Laora kulu matye kamol a ki i Ot pa Lubanga

11

Danonu dok otela odwoka cen i dogola kama kidonyo ki iye i Ot pa Lubanga. Ci aneno pii tye kamol kun kati ki ite dogola dok yo tung kunyango (pien Ot pa Lubanga bene onongo tye okemo yo tung kunyango). Ci piine onongo tye kamol bino piny kun a ki piny yo tung kupiny ite dogola me Ot pa Lubanga, kun wok kwede inget keno tyer tung kupiny. 2Lacen okela woko kun wok kweda ki i dogcel matye yo tung kumalo, ci owoto kweda orumu cel ki yo tung woko obino kwede i dogcel ma woko ma okemo yo tung kunyango. Laora kulu ni onongo tye kamol kati woko inget dogcel yo tung kupiny. 3Ikare ma wacito wadok yo tung kunyango ci danonu dok omako lagada lapim piny i cinge, ci opimo piny mita miya abic kun lubu i laora yo tung piny dok kwede tung kunyango, ci omiyo akato ki idye pii. Piine onongo tute o wa i odilo tyena. 4Ka dok opimo piny mita miya abic, ci omiyo awoto ki i pii ki tyena; piine onongo tute o wa iwangcong. Dok opimo piny mita miya abic, ci omiyo anyono dye pii; piine onongo dong tute o wa i pyera. 5Ka dok opimo mita miya abic, ci laora dong odoko kulu mo ma pe dong atwero kato ki idyere, pien pii onongo dong opong omede woko. Kulunu onongo dong tut ma pe kitwero ngolone ki tyen, kono ka kikwang iye akwanga aye romo kate. 6Ci en openya ni, “Wod pa dano, dong ityeko neno gin man ducu maber?”

Ka dong odwoka cen kun woto kweda ki i dog kulu. 7Ikare ma atye kawot me dok cen kwede, aneno yadi mapol tutwal i dog kulu tungi ki tungi. 8Ci en owacca ni, “Pii man tye kamol kemo lobo matye yo tung kunyango ci cito wa i Araba. Ka pii dong oo i pii me nam ma ocung mot liywi ma pe mol, ci pii me nam dong ocako doko leng. 9I kabedo ducu ma kulu man mol cito iye, gin ma core limuk ma gibedo i pii gibibedo kwo, ki rec bene gibedo pol ata. Pii man mol cito kunu wek pii me nam odok leng; dok bene gin makwo ducu gibibedo kwo kama kuluni mol cito iye ducu. 10Cake ki i En-gedi dok kwede tung iwang pii En-eglaim, lumakrec bibedo kunu i dog nam, ci gibimoyo obwogi bibedo katwo kunu bene. Kwayi rec ma patpat bibedo kunu calo rec ma gibedo i Nam Mediterranean. 11Ento pii matye i kabedo ma obedo dagodago ki i jorogu pe gibidoko leng. Gibiweko piine ducu bedo pii me kado. 122Dong i dog kulu ryoryo ducu, yadi ducu ma kitgi patpat bidongo iye kun ginyako nyiggi me acama pa dano. Potgi bene pe bitwo dok bene pe gibigiko nyak. Ci gibibedo kanyak dwe ki dwe, pien gilimo pii ma mol a ki i kabedo malengi. Nyiggi bene bibedo me acama pa dano, ki potgi bibedo yat ma cango two ki ikom dano.”

Wang apoki lobo

13An Rwot Lubanga Matwero ducu dok awaco kuman ni, “Magi aye wang apoki lobo ma ibilubu ka i poko lobo ikin kaka apar wiye aryo me Icrael me bedo ginaleyagi. Ento jo me kaka pa Yucepu ibipoko botgi dul lobo ma dodo pa jo mukenenigu kiryo. 14Yam onongo akwongo kwong kun acike bot kwariwu ni abimiyo lobo man botgi wek gucam odok meggi; pimeno kombedi myero dong ipok i lobo man woko marom ikinwu.

15Ci wang apoki lobo ne bibedo kit man: tung kumalo wange cake ki i Nam Mediterranean kun wok ki i Ketlon cito kwede i yoo ma donyo i Kamat, o kwede wa i Jedad, 16Berota, Cibraim (matye iwang apoki ikin Damaciko ki Kamat), dok mede cito kwede wa yo tung Kajer-atikon; matye iwang apoki me Kauran. 17Kitmeno wang apoki lobo matye yo tung kumalo bicake ki i Nam Mediterranean cito kwede tung Kajar-enon, matye iwang apoki me Damaciko, ki wang apoki me Kamat matye yo tung kumalo.

18Ci wang apoki lobo matye yo tung kunyango bicake ki i Kajar-enon ikin Kauran ki Damaciko, ma lubu kulu Jordan ikin Gilead ki lobo Icrael, dok kwede i nam matye yo tung kunyango kun o kwede wa i Tamar.

19Ci wang apoki lobo matye yo tung kupiny bicake ki i Tamar cito wok kwede ki i pii me Meriba-kadec, ka dong lubu laora kulu me Ejipt o kwede wa i Nam Mediterranean.

20Wang apoki lobo matye yo tung kupotoceng bicake i dog Nam Mediterranean cito kwede i kabedo ma okeme ki yoo ma donyo i Kamat. Man aye bibedo wang apoki matye yo tung kupotoceng. 21Ci ibipoko lobo man woko ikinwu kitmeno kun lubu kit macalo wel kaka pa jo Icrael tye kwede. 22Dok ibipoko lobo man kun ibolo ki gin kwir me ngeyo lobo ma obedo ginaleyawu kikome, ki pi lurok ma gin lubedo ma gibedo ikinwu, ma dong bene gutyeko nywalo lutinogi ikinwu. Kun wubitic kwedgi macalo gin anywali me Icrael kikome, ma gin bene gibibolo kwir kacel kwedwu wek ginong dul lobo mo me bedo ginaleyagi ki ikin kaka pa Icrael. 23Larok acel acel ma labedo gibimiye dul lobo me bedo ginaleyane, kacel ki lwak me kaka moni ma en bedo ikin gi. An Rwot Lubanga Matwero ducu dong atyeko loko.