Ejekiel 46

Kit ma laloc bikwero ki nino madito

1An Rwot Lubanga Matwero ducu awaco kuman ni, “Dogcel me dyekal ma i iye matye yo tung kunyango kibiloro woko pi nino abicel, ma en aye kare ma nongo dano gitye katic. Ento kibiyabo inino me Cabit ki inino me Karama me Por Dwe. 2Dong laloc bidonyo kun wok ki i kicika ma i dogola me donyo matye yo tung woko, ci bicung cok ki yat me dogcel. Ka dong ajwaki gicako tyero gitum awangane ki gityer lakwecwiny ma en okelo, ci en dong cako woro Lubanga idyekal matye cok ki dogcel. Ka ingeye dong en bia kato woko, ento dogcel meno pe kibiloro nio wa otyeno. 3Lwak me lobo gibibedo kaworo Rwot i kabedo kama kidonyo ki iye matye i dogcel meno inino me Cabit ducu ki inino Karama me Por Dwegu ducu. 4Gitum awanga ma laloc bityero bot Rwot inino me Cabit bibedo lutino romi abicel ma komgi pe kimwonyo, ki nyok romo acel ma kome pe kimwonyo. 5En bikelo gityer me moko kwon pi nyok romo maromo epa acel, ki bene gityer me moko kwon pi lutino romi en bikelo kit macalo en twero, kacel ki cupa apar me moo pi agwata adekadek me moko. 6Inino me Karama me Por Dwe en bityero latin twon ma kome pe kimwonyo, ki lutino romi abicel ki nyok romo acel, ma gin ducu myero komgi pe obed kimwonyo. 7Gin ma en bityero macalo gityer me moko kwon aye agwata adek pi wod twon, ka dok agwata adek pi nyok romo, ki pi lutino romi moko kwon kit macalo en twero nongone, kacel ki cupa apar me moo pi agwata adekadek me moko. 8Ka laloc donyo i Ot pa Lubanga, ci en bidonyo kun wok ki i kicika ma i dogola me donyo me dogcel, dok bene en bia kato woko ki i yoo acelu.

9Ka inen lwak me lobo meno gubino kaworo Rwot inino madito ma giciko, ci jo ma gibidonyo ki i dogcel matye yo tung kumalo, ka gutyeko woro Rwot ci gibikato woko ki i dogcel matye yo tung kupiny. Ci jo ma bidonyo ki i dogcel matye yo tung kupiny, gibikato woko ki i dogcel matye yo tung kumalo. Ngat mo pe ma bidok cen ki ngeye ki i dogcel ma kong onongo en odonyo kwedeni, ento dano acel acel bicito atir kato woko ki i dogcel matye inyime. 10Ka inen lwak gidonyo kaworo Rwot, ci laloc bene donyo kacel kwedgi, ka gikato woko, ci en bene bikato woko kacel kwedgi. 11Ikare me kwero nino madito ki kare ma kiciko, gibikelo gityer me moko kwon ki latin twon marom pi epa acel, ki nyok romo marom pi epa acel, ki lutino romi pi moko kwon kit macalo dano moni twero miyone kwede; kacel ki cupa apar me moo pi epa acel acel me moko.

12Kace laker mito miyo gityer ma iye opwoyo, kadi onyo gitum awanga nyo gityer lakwecwiny calo gin ma iye opwoyo bot Rwot, ci gibiyabo bote dogcel matye yo tung kunyangoni, ci en bidonyo ki iye. Ka dong en cako tyero gitum awangane nyo gityer lakwecwiny kit macalo en tyero inino me Cabit. Ci lacen en dong a kato woko, ki ingeye ma en dong nongo okato woko ci kibiloro dogcele woko kakare.

Gityer ma gityero bot Rwot nino ki nino

13Laloc dok bimiyo latin romo acel me mwaka acel makome pe kimwonyo me gitum awanga bot Rwot nino ki nino, i odiko. 14Dok bene omyero omii gityer me moko kwon kacel ki gitum awanga i odiko ki odiko, ki acel me abicel me epa, ki moo cupa adek wek okwe moko woko, ma kimiyo calo gityer me moko kwon bot Rwot. Man aye cik ma omyero kilubgi pi gitum awanga ma kityero nino ducu. 15Gityer ma kikelo pi gitum awanga me nino ducu odiko ki odiko tye kit man: latin romo ki gityer me moko kwon ki moo.”

Laker ki lobo ma gipoko bote

16Rwot Lubanga Matwero ducu owaco kuman ni, “Kace inen laker mito miyo mot bot latine mo ki ikin awobene bene, kun poko ki kom dul lobo mayam kimiyo me bedo ginaleyane, meno bibedo ginaleya pa awobene ducu, meno dong odoko jamigi. 171Ento kace en okwanyo dul ma kipoke ci omiyo me mot bot lutice, ci lacen bibedo jami pa laloc ka mwaka me bedo agonya dong oo. Pimeno ginaleyani dong obedo mere, dok lutinone keken aye gitwero gamone bedo meggi matwal. 18Laloc pe bikwanyo kit dul mo ki ikom ginaleya pa lwak, pe bikwanyo jamigi woko ki botgi. En omyero omii dul mo bot lutinone me bedo meggi kun kwanyo ki ikom lobo ma dong kimiye me bedo mere, wek pe en oun dano mo ki ikom jona kun kwanyo lobogi woko.”

Jokon matye i Ot pa Lubanga

19Lacen danonu dok otera wa i dogola kama kidonyo kwede i kicika mapol matye cok ki dogcel matye tung kupiny me dyekal ma i iye. Magi aye kicika maleng ma kiyubu pi ajwaki. Ci en ocimo bota kabedo mo matye wa i agiki me kicika magi matye tung kunyangoni, ci aneno. 20Ci en dok owaca ni, “Man aye kabedo kama ajwaki omyero guted iye gitum me tingo alii ki gitum pi bal, ki kama bene kitedo iye gityer me moko kwon, wek pe guting gin mo maleng ci gukel idyekal ma woko kama gitwero nyobo ki lwak kwede.”

21Lacen en okela idyekal ma woko, ci otela otera itwok dyekal angweni; itwoke acel acel onongo dyekal matidi tye iye. 22Itwok dyekal angweni onongo tye iye dyekal matinotino, ma acel acel bore romo puti pyere abicel wiye angwen ki lace puti pyere abic, gin angwenni ducu onongo ditogi rom. 23Dyekal acel acel onongo kirumu woko ki cel ma kigero ki got, ki keno kama kikutu iye mac bene kiyubu inget cel. 24Ci danonu owaca ni, “Magi aye jokon kama lutic ma gitiyo i Ot pa Lubanga omyero guted iye gitum ducu ma lwak gityero.”