Ejekiel 45

Dul lobo ma kipoko ci kimiyo bot Rwot

1Kace wupoko lobo kun wumiyo dul ki kaka acel acel, ci dul acel myero kiket cen pat obed gin maleng pa Rwot. Bor pa dul lobo man myero obed mairo apar ki lace mairo aboro. Dong dul lobo meno ducu bibedo kabedo maleng. 2Dul lobo mo ma twoke angwen ducu romrom myero kiwek pi Ot pa Lubanga, ma twoke acel acel nongo romo puti miya aboro. Ci kabedo ma kiweko nongo bene bibedo tye murumu kabedo meno woko dyere ma lace romo puti pyere aboro. 3Ikom dul lobo man malengi myero kipim dul mo ma bore romo mairo apar ki lace mairo angwen, kipok wange woko obed pat, ci Ot pa Lubanga bibedo i kabedo man, ma en aye kabedo maleng makato ducu. 4Man bibedo dul lobo maleng dok bene bibedo pi ajwaki ma gitiyo i kabedo maleng, kun ginyiko cok bot Rwot me tic bote. Man bene bibedo kabedo kama odigi bibedo iye ki kabedo maleng pi Ot pa Lubanga. 5Dul mukene ma bore romo mairo apar ki lace mairo angwen, kibiketo ne pat bedo dul pa Lulevi ma gitiyo tic i Ot pa Lubanga. Dul lobo man Lulevi gibicamo bedo meggi matwal, dok bene i kabedo man aye gibigero iye ganggi kama gibibedo iye. 6Inget dul lobo ma kiketo pat me bedo kabedo malengi, ci omyero kipim kabedo kama kibigero iye gang, ma bore romo mairo apar ki lace mairo aryo. Kabedo man bibedo pa jo Icrael ducu.

Lobo pi laker matye kaloc

7Myero bene kipim dul lobo kiket pi laker. Cake ikom kabedo murumu kabedo maleng ki ikom gang, lobone bidok kwede tung kupotoceng ki tung kunyango oo iwang apoki matye yo tung kunyango. Cake ki tung kunyango o kwede yo tung potoceng bore bibedo rom ki bor pa dul lobo ma kipoko kimiyo ki kaka me Icraeli. 8Meno bibedo dul lobo pa laker i lobo Icrael. Dong lukera ma gin luloc pe dong gibiunu jona matwal; ento gibimiyo jo Icrael gigamo lobo kun lubu kakagi ducu.”

Cik pi luloc ma i Icrael

9An Rwot Lubanga Matwero ducu awaco kuman ni, “Wun luloc me Icrael dong wutimo bal oromo! Wugik tim bwami ki unu dano woko. Wutim gin matye atir dok kakare. Pe myero dok wuryem jona woko ki i lobogi, an Rwot Lubanga Matwero ducu aye ma atye kawaco lok man botwu. 101

Wun ducu, ngat acel acel myero obed ki ratili maber ma en pimo kwede jami i mijani ki me pimo gin ma pige ikare ni. 11Epa2 ma kipimo ki jami ma otwo bibedo rom ki bat ma kipimo kwede jami ma pige. Bat rom ki acel me apar me komer, ki epa bene rom ki acel me apar me komer; dong komer aye bibedo gin ma dano ducu myero gupim ki jami. 12Cekel acel bibedo rom ki gera pyere aryo; cekel abic bibedo cekel abic, ki cekel apar bibedo cekel apar, ka dong mina acel bibedo rom ki cekel pyere abic.

13Ci man aye gityer ma wubikelo me atyera: acel me abicel me epa ma oa ki ikom komer acel acel me ngano, ki acel me abicel ma oa ki ikom komer acel acel me cayiri. 14Kit dul ma kimoko me pimo moo tye kuman: acel me apar me bat ma oa ki ikom kor acel acel (kor obedo calo komer, tye iye bat apar). 15Dok bene wubikwanyo romo acel ki ikin lwak romi miya aryo, kun wukwanyogi ki bongo me dog Ot pa Icrael ducu. Man aye gityer ma kibityero pi gityer me moko kwon, gitum awanga, ki gityer lakwecwiny, pi timo gin me lakwany bal woko ki ikomgi. Man an Rwot Lubanga Matwero ducu ma awaco.

16Ci lwak ducu me lobo man gibimiyo gityer man bot laker matye i Icrael. 17Ci dong ngat matye kaloc aye ma bimiyo lee me gitum awanga, gityer me moko kwon, ki gityer amata ikare me kwero nino madito, i Por Dwe, ki nino me Cabit ducu, ki ikare me kwero nino madito ducu ma giciko pi jo Icrael. En laloc meno bimiyo lee me gitum pi bal, ki gityer me moko kwon, ki gitum awanga, ki gityer lakwecwiny, pi timo gin me lakwany bal woko ki ikom jo Icrael.”

Nino madito me Kato

(Nia 12:1-20; Lev 23:33-43)

18An Rwot Lubanga Matwero ducu awaco kuman ni, “Inino mukwongo me dwe mukwongo, wubikwanyo latin twon ma kome pe kimwonyo, ci wulonyo kwede kabedo maleng. 19Ajwaka bikwanyo remo manok me gitum pi bal ci keto ikom dogola me Ot pa Lubanga; biketo bene i twok keno tyer angwen ni, ki ikom yat me dogcel me dyekal ma i iye. 20Ibitimo kitmeno inino me abiro me dwe mukwongo pi dano mo ma otimo bal pi roc mo nyo pi kwiya piny. Ibitimo gin lakwany bal woko pi lonyo Ot pa Lubanga wek obed maleng. 213Inino dwe apar wiye angwen me dwe mukwongo, en aye wubikwero iye nino me Karama me Kato, kun wubedo kacamo mugati ma tobi pe iye pi nino abiro. 22Inino meno laloc bikwanyo latin romo miyo me gitum pi bale ki pi bal pa lwak ducu ma i lobo. 23Dok inino acel acel ikom nino abiro me kwero nino me Karama me Kato aye en bimiyo lutino twoni abiro ki nyogi romi abiro ma komgi pe kimwonyo, ci tyero me gitum awanga bot Rwot. En bene bibedo katyero nyok dyel acel acel nino ki nino me gitum pi bal. 24Ci en laloc dok bimiyo gityer me moko kwon maromo agwata adek pi twon acel acel, ki dok agwata adek pi nyok romo acel acel, ki moo maromo cupa apar pi moko kwon maromo agwata adekadek.

25Inino dwe apar wiye abic me dwe me abiro ki bene pi nino abiro ma kibedo kakwero nino madito me Boloni, en pud dok bimede ki miyo gitum pi bal, gitum awanga, ki gityer me moko kwon, ki moo bene ikit yo aceli.”