Ejekiel 44

Tic ma kitiyo i Ot pa Lubanga

1Lacen danonu dok odwoka cen i dogcel ma woko me kabedo maleng, ma onongo tye yo tung kunyango; ento onongo kiloro woko. 2Ci owaco bota ni, “Dogcel man bibedo alora kare ducu, ma pe kibiyabo, dok bene ngat mo pe dong bidonyo ki iye; pien Rwot, ma en Lubanga pa Icrael, dong otyeko donyo ki iye. Pimeno bibedo alora kare ducu. 3Laker matye kaloc keken aye gwok bibedo iye kunu kacamo kwon inyim Rwot; en bidonyo ki i yoo ma wok ki i kicika ma i dogola me donyo, dok bene bikato ci cito woko ki i yoo acelu.”

Cik ma ye dano me donyo i Ot pa Lubanga

4Ci danonu dok okela kun wok kweda ki i dogcel matye tung kumalo wa inyim Ot pa Lubanga. Ka aneno piny ci aneno ni deyo pa Rwot opongo Ot pa Lubanga woko. Cutcut apoto aryebe woko piny, 5ci Rwot owaca ni, “Wod pa dano, ket cwinyi me niang maber ikom gin ducu ma ineno ki ma iwinyo ki iti. Abititi cik ducu me Ot pa Lubanga ki ikom gin ducu ma myero dano guti dok gulubi. Dok iket cwinyi me niang maber ikom kit dano ma kiyegi me donyo i Ot pa Lubanga, ki jo ducu ma pe kiyegi me donyo i kabedo maleng.

6Ci dong iwac lok man bot jo Icrael ma gin jo ma lujemoni ni, an Rwot Lubanga Matwero ducu awaco kuman ni; gin jo Icrael myero dong gugik kit tim me kwergigu woko ducu liweng. 7Gupyedo oda pi ye lurok ma pe kilirogi i cwinygi ki ikomgi me bedo i kabedona maleng, ikare ma dong kityero bota cam ma mega, moo dwolo ki remo me gitum. Pimeno jona dong gutyeko turu gicikena woko ken gi, medo ikom gin me kwergu ducu mayam gutimo. 8Pe bene gubedo kagwoko kit ma kitiyo kwede ki jamina malenggu ducu; ento guketo lurok aye me tic i kabedona maleng.

9Ma omiyo an Rwot Lubanga Matwero ducu awaco kuman ni: pe tye larok mo ma pe kiliro i cwinye ki ikome ma bidonyo i kabedona maleng, kadi bed larok mo ma ikin lurok ducu ma gibedo ikin jo Icrael.

10Ento Lulevi mayam gua woko ki bota gucito woko kamabor, ma gungak gubwota woko calo jo Icrael mayam gungak woko gubedo kaworo jogi, kombedi dong atye kamiyo pwod ikomgi malube ki weko winyo lok mera ma gutiyo. 11Gin gibibedo lutica i kabedona maleng, kun gigwoko dogcel me Ot pa Lubanga, kun gitiyo bene tic i Ot pa Lubanga. Gin aye ma gibineko lee ma dano gikelo me atyera me gitum awanga ki gitum pi lwak, dok bene gibibedo i dog ticgi kun gitiyo bot lwak. 12Ento kit macalo gubedo katelo, jona jo Icrael kaworo cal jogi ma kipayo apaya ma en aye gin ma omiyo jo Icrael gupoto i bal, pimeno an Rwot Lubanga Matwero ducu dong akwongo kwong ma okemogi ni abipwodogi pi kwero winyo lok mera. 13Pe dong gibibedo katic bota macalo ajwaki, dok bene pe gibinyiko cok ikom jamina malenggu ki ikom jamina maleng makato ducugu. Ento lewic bimakogi pi gin me kwer ducu mayam gutimogu. 14Kadi bed kumeno pud abiyerogi aketogi me tic i Ot pa Lubanga, kun gitiyo kwayi tice ducu ki kwayi tic ducu ma mite ma myero giti iye.”

Ajwaki

15Rwot Lubanga Matwero ducu dok owaco ni, “Ajwaki ma gin Lulevi, ma gin likwayo pa Jadok, ma gubedo katiyo tic i kabedona maleng ikare ma jo Icrael gungak gubwota woko, gin aye gibibino cok bota katic bota. Gin aye dong gibitiyo bota kun gityero bota moo dwolo ki remo. 16Gin aye gibidonyo i kabedona maleng, kun bene ginyiko cok ki mejana, pi tiyo tic bota, ki pi lubu gin ma an aciko ducu. 171Ka gudonyo i dogcel me dyekal ma woko, ci gibiruku bongi camanini. Pe gibibedo ki ginaruka mo me yer romo ikomgi ikare ma nongo gitye katic i dogcel me dyekal ma i iye, ki bene i Ot pa Lubanga kikome. 18Ci gibiboyo wigi ki kitambara me bongo camanini, dok bene gibiruku pali bongo camanini i pyergi; pe gitweyo nyo giruku gin mo mamiyo kwok makogi. 192Ka inen gikato gicito woko bot lwak idyekal ma woko, ci gibilunyu bongi ma gubedo katic kwedgini woko ki ikomgi, ci giketo bedo i kicika malengi. Dong gibiruku bongi mukene, wek pe gunyob lwak ki bongigi malenggu. 203Ajwaki pe gibilyelo wigi woko dong maleng, dok bene pe gibiweko yer wigi lot maboco; ento gibinyaro yer wigi woko anyara keken. 214Ajwaka mo pe bimato kongo bwino kacito kadonyo idyekal ma i iye ma i ot pa Lubanga. 225Ajwaki pe gibinyomo dato mo, nyo dako ma cware oryemo woko, ento gibinyomo nyako ma pe ongeyo laco i dog Ot pa jo Icrael kikome, dok bene gitwero nyomo dato mo ma onongo yam kong cware obedo ajwaka. 236

Ci gibipwonyo jona me ngeyo apokapoka matye ikin jami maleng ki jami me nino ducugu, kun ginyutu botgi bene kit ma myero gupok kwede ikin gin ma keni ki gin ma pe keni. 24Kace lok daa nyo pido mo tye, ci gin ajwaki gibibedo lungolkop, ci gibingolo kop kun gilubu kit ma an angolo kwede kop. Gibigwoko cika ki gin ma an aciko ducu, pi kwero nino madito ma giciko ducu, ci dok bene gibigwoko ceng Cabita ducu bedo nino maleng. 257

Dong ajwaki pe bibalo komgi keken gi pi cito cok ki kom dano ma oto; gwok nyo kono gitwero balo komgi kace kom dano mo ma otoni obedo wegigi nyo megigi, kom latin awobigi nyo nyako ma meggi, kom omegigi nyo kom lumegigi ma pe kinyomogi. 26Lacen ma nongo dong ajwaka mo obalo kome woko kekene, ci en bikwano nino abiro ma myero ebed kwede, ka dong ingeye lonye woko bedo leng. 27Inino ma en cito i kabedo maleng, idyekal ma i iye, katic kunu, ci en ajwaka bityero gitum pi bale. Man an Rwot Lubanga Matwero ducu ma awaco. 288

Dong dul gin me aleya pa ajwaki ki ikom gin ma amiyo bot jo Icrael me aleyagi en aye obedo ticgi me bedo ajwakina. Gin ajwaki pe gibibedo ki kit jami mo i lobo Icrael; ento lonyo ma kimiyo pirgi me agwoka aye an Rwot. 299Ajwaki gibicamo gityer me moko kwon, gitum pi bal, ki gitum me tingo alii; ki gin ducu ma kidyero i cinga i Icrael bibedo meggi. 30Ajwaki myero kimii botgi cam ducu mukwongo cek i poti ki kit kwayi gin mukenegu ducu ma kityero bota. Pi tyen mukwongo ma nongo lwak gitedo mugati omyero kong gukwany mugati ma kikwongo tedone gumii bot ajwaki, wek gum mera obed ikom jo ma i pacogi. 3110Ajwaki pe gibicamo kit gin mo ma oto kene nyo lee mo ma nguu aye okayo, kadi ka winyo onyo lee tim.