Ejekiel 43

Rwot Lubanga odwogo i Ode ki deyone

1Lacen dok danonu okela wa i dogcel ma okemo yo tung kunyango. 21Nen, deyo pa Lubanga pa Icrael oa ki yo tung kunyango, kun mor calo mor pa pii ma core; ci omiyo lobo obedo karyeny aryenya ki deyone. 3Dong ginanyuta ma aneno obedo rom ki ginanyuta mayam con aneno ma onongo Rwot obino kajwero taun madit me Jerucalem wokoni, dok bene obedo calo ginanyuta mayam aneno inget kulu Kebarni. Ci cutcut apoto aryebe woko piny. 4Deyo pa Rwot okato ki i dogcel matye yo tung kunyango ci odonyo i Ot pa Lubanga.

5Ci Cwiny pa Rwot dok otinga woko malo, okela wa idyekal me Ot pa Lubanga ma i iye; ci aneno deyo pa Rwot opongo i Ot pa Lubanga woko. 6Ikare ma onongo danonu pud ocung kangeta, ci awinyo ngat mo tye kalok kweda ki i Ot pa Lubanga, 7kun waca ni, “Wod pa dano, man aye kabedo kama komkera bedo iye, dok bene en aye kabedo kama ateno iye tyena; en aye kama abibedo iye ikin jo Icrael matwal. Dong jo Icrael, nyo lukergi, pe dok gibimede ki balo nyinga malengi, kun giworo iye lubanga mukenegu nyo gibicibo iye gin me nipo pi lukergi mogo ma dong guto woko ci kiyikogi iye. 8Lukergi yam guyubu dogolagi okeme ki dogolana ki dok bene guketo yat dogolagi okeme ki mera, man omiyo dong tye cel acel keken ma opoko kinwa kwedgi. Oweko gubalo nyinga malengi ki gin me kwergu ducu mayam gutimo, ci omiyo kiniga omaka atyekogi woko liweng. 9Kombedi dong myero gukwany cal lubangagigu gubol woko, ki gin me po ikom lukergi mayam dong guto wokogu, ci gubol woko kamabor ki kangeta, ci an abibedo i dyegi matwal.”

10Ci Rwot dok omede ki loke kun waca ni, “Wod pa dano, tit kit yub me Ot pa Lubanga bot jo Icrael, ki tit botgi bene kit ma onongo nen kwede, ki kit ma yub pa Rwot tye kwede pire, wek omii lewic omakgi pi balgi. 11Ka dong ineno lewic omakogi pi bal ducu mayam gutiyo, ci dong itit botgi yub ma onongo kigero ki Ot pa Lubangani, ki kit ma kigero kwede dogolane me donyo ki dogcel kama kikato ki iye ki kama kidonyo ki iye, ki kit ma gedo me Ot pa Lubanga ducu ocung kwede. Dok bene imii gunge kit me lubu cike ducu, ki gin ma Rwot bene ociko ducu; ci icoogi woko piny ki inyimgi ma gin bene gineno, wek omii gin gugwok dok guti gin ma giciko ducu kun gilubu cike ducu. 12Man aye cik me Ot pa Lubanga: kabedo ducu murumu matye iwi got bibedo kabedo maleng makato ducu. Man aye cik me Ot pa Lubanga.”

Keno tyer

132

Magi aye kit pim ma kipimo kwede keno tyer, kun kitiyo ki gin me pimo piny marom ki kit macalo kipimo kwede Ot pa Lubangani, ki kama orumu te tedi me keno tyer onongo tye ducu romo puti acel ki incic aboro, ki lace bene puti acel ki incic aboro, ki rii matye ka wiye bore romo incic apar. Meno aye bor me keno tyer tung malo. 14Dul kom keno tyer ma pinye makato ducu onongo bore romo puti adek. Dul mukene ma lubu onongo kiketo ocung cen manok tungi ki tungi ci oromo puti acel ki incic aboro, ki bore onongo romo puti abiro. Ki dul mukene matye iwi meno ma kiketo ocung wa cen manok tungi ki tungi oromo puti acel ki incic aboro. 15Meno aye wi keno tyer kama kiwango iye gitum awanga; kun bore onongo bene romo puti abiro. Ten keno angwengu ducu onongo giboco gikato wi keno tyer mukenegu ducu. 16Wi keno tyer onongo tye latwoke angwen maromrom, ma twoke acel acel onongo romo puti pyere aryo. 17Ki dul ma idyere bene onongo obedo latwoke angwen, maromrom, ma acel acel onongo romo puti pyere aryo wiye adek; ki rii ma giketo orumu ducu bore onongo romo incic apar. Tedi tere onongo lace ducu romo puti acel ki incic aboro. Kidok rwom me cito malo ikom keno tyer onongo tye yo tung kunyango.

Kwero keno tyer wek obed maleng

18An Rwot Lubanga Matwero ducu dok awaca kuman ni, “Wod pa dano, magi gin aye cik me keno tyer: ka dong kityeko gerone me tyero lee me gitum awanga iwiye ki pi coro remo ikome, 19ci ibimiyo twon me gitum pi bal bot ajwaki ma gin Lulevi ma gin jo me dog ot pa Jadok, ma gibibino cok kweda katic bota. 20Ci ibikwanyo remo mogo ki ikom remo pa twon ca, ci iket iteng keno tyer angwengu ki ikom twok doge angwen, ka dok ikom rii ma kiketo orumu wokoni. Meno aye kit macalo ibilonyo kwede keno tyer wek obed maleng, ci ibimiyo bedo labongo bal mo ikome. 21Dok bene ibikwanyo twon me gitum pi bal, ci kibiwangone woko i kabedo ma kiyero ma inget Ot pa Lubanga, ki tung woko me kabedo maleng. 22Ka dok ikom nino me aryone ibityero nyok dyel ma kome pe kimwonyo me gitum pi bal, ci kibilonyo keno tyer bene kitmeno macalo kikwongo lonyo ki twoni. 23Ka dong ityeko lonyone, ci dong ibityero twon ma kome pe kimwonyo ki nyok romo ma kikwanyo ki ikin lwak romi ma kome pe kimwonyo. 24Ibityero bot Rwot, ki ajwaki gibikiro kado ikomgi ka dong gicako tyerogi bot Rwot macalo gitum awanga. 25Dok ibimiyo dyel pi nino abiro me gitum pi bal, kun inino acel acel nongo imiyo dyel acel. Dok bene kibimiyo twon ki nyok romo ma gikwanyo ki ikin lwak romi ma kome pe kimwonyo. 26Ci gibityero gitum lakwany bal pi keno tyer pi nino abironu kun gilonyo obed leng, dok kikwero bene. 273Ka dong gutyeko nino magi abiro, ci dong cake inino me aborone cito kwede anyim, ajwaki gibityero gitum awangawu ki gityer lakwecwiny ikom keno tyer, ci an abigamowu. An Rwot Lubanga dong atyeko loko man.”