Ejekiel 42

Odi aryo ma kigerogi cok ki Ot pa Lubanga

1Danonu dok otelo nyima ci otera wa idyekal ma i iye matye tung kumaloni, ci dok okela wa i kicika mapol ma onongo gukeme ki dyekal me Ot pa Lubanga ma onongo okeme ki ot matye tung kumaloni. 2Ot man ma onongo tye tung kumaloni onongo bore romo puti miya acel ki pyere abicel, ki lace onongo romo puti pyere aboro. 3Ki tungcel onongo okemo kabedo ma lace romo puti pyere adek wiye aryo ma inget Ot pa Lubanga, ki tungcel onongo okemo kabedo kama kicano iye gweng me dyekal ma woko. Ot man onongo yam kigero i dul adek ma gukube malo iwi wadi, dul ot acel acel onongo tye ki yoo mukemo yoo wadi ma donyo i odi ma gukube malo i dul adeki. 4Inyim kicika magi onongo yoo tye iye me donyo i ot ki tung kuiye kunu, ma lace onongo romo puti apar wiye abicel ki bore puti miya acel ki pyere abicel; ki dogolagi ducu onongo tye tung kumalo. 5Kicika mamalo onongo kigero mading, pien kicika ma piny ki ma idyere onongo gumayo kabedo ki piny woko malac. 6Pien onongo gitye odi ma gukube malo i dul adek, ci onongo wir bene pe i igi calo wir ma onongo tye idyekal ma wokoni. Ma omiyo kicika mamalo kidiyo woko obedo mading makato kicika ma gucung i ngom ki ma idyeregu. 7Onongo bene tye cel ki woko ma opime ki kicika ducu atir, kun okemo tung dyekal ma woko, dong kama okeme ki kicika onongo bore romo puti pyere aboro. 8Kicika ma onongo tye ikom dyekal ma woko onongo bocogi romo puti pyere aboro, kun kicika ducu ma gukemo Ot pa Lubanga bocogi onongo romo puti miya acel ki pyere abicel. 9Ki tung piny ite kicika magi onongo tye iye dogola me donyo tung kunyango, ka dok onongo dano gidonyo i igi ki tung idyekal ma woko, 10kama cel matye tung woko ocake ki iye.

Onongo tye kicika mogo bene tung kupiny ma gukeme ki dyekal dok gukeme bene ki ot maditi, 11ci yoo onongo bene tye inyimgi. Onongo giromrom ki me kicika ma gitye tung kumalo, ma bocogi ki lacgi bene rom, ki kit ma kigerogi kwede bene rom, ki wa dogolagu ducu girom. 12Kidok onongo bene tye dogola me donyo tung kunyango ki piny ite kicika ma gitye tung kupiny, kama dano donyo ki iye tuc i yoo, ki i dog cel ma opoko kin gi onongo okeme kwedgi.

13Danonu dok owaca ni, “Kicika magi ducu matye tung kumalo ki kicika ma gitye tung kupiny ma gukeme ki dyekalgi aye kicika maleng. I kicika magi en aye ajwaki ma gidonyo katic inyim Rwot gicamo iye gityer maleng makato ducu. Kunu aye kiketo iye gityer maleng makato ducu, gityer me moko kwon, gitum pi bal, ki gitum pi tingo alii, pien kabedo meno aye kabedo maleng. 14Ka inen dong ajwaki gudonyo i Ot pa Lubanga, pe gibia gikato woko ki iye gicito idyekal ma woko labongo weko bongigi ma giruku ka gitye katic kunu, pien bongi magi gileng. Gibiruku bongi mukene ma pud peya nongo gucito cok ki kabedo kama lwak gucoke iye.”

Kit ma kipimo kwede kabedo murumu Ot pa Lubanga

15Lacen ka dong danonu otyeko pimo kabedo matye tung i iye murumu Ot pa Lubanga, ci otelo nyima otera wadonyo ki i dogcel ma okemo tung kunyango, ci ocako pimo kabedo ma orumu Ot pa Lubanga ki woko. 16Ci opimo kabedo matye tung kunyango ki lagada me pimo piny, ci opimo ki lagada meno oromo puti miya aboro. 17Ka dok oloke ci opimo kabedo matye tung kumalo, opimo ki lagada me pimo piny oromo puti miya aboro. 18Ka dok oloke opimo kabedo matye tung kupiny, opimo ki lagada me pimo piny ci oromo puti miya aboro. 19Lacen en dok oloke yo tung kupotoceng ci opimo ki lagada lapim piny, ci oromo puti miya aboro. 20Ci dok opimo twoke angwen ducu. Onongo bene tye cel murumu woko litit, ma bore romo puti miya aboro ki lace bene puti miya aboro, wek opok kin kabedo maleng ki kabedo me nino ducu.