Ejekiel 41

1Lacen dok danonu okela i kicika ma idyere. Ci opimo yoo ma kikato ki iye onongo bore romo puti apar, 2ki lace onongo puti apar wiye abicel, ki dit me kom cel onongo romo puti aboro tung ryoryo ducu. Ka dok opimo kicika onongo bore romo puti pyere abicel wiye angwen, ki lace romo puti pyere adek wiye aryo.

3Lacen danonu odonyo i kicika me agikine. Ci opimo dogola me donyo, bore puti adek ki lace puti apar, ki dit kom kicika tung ryoryo ducu onongo romo puti apar wiye acel. 4Ka opimo kicika bore oromo puti pyere adek wiye aryo ki lace puti pyere adek wiye aryo. Ka lacen owaca ni, “Man aye Kabedo Maleng makato ducu.”

Kicika kigerogi ikom cel me Ot pa Lubanga

5Danonu opimo cel me Ot pa Lubanga ci dite oromo puti apar. Dong ikom cel man ma orumu Ot pa Lubanga woko ducu ni, onongo tye iye kicika matinotino, ma lacgi onongo romo puti abicel. 6Kicika ma ingete onongo tye i dul adek ma gukube gudok malo, ma acel acel onongo odode iwi wadi kun dul odi acel acel tye ki kicika pyere adek. Ci onongo bene tye gin me latyel kor kicika ducu ma orumu cel me Ot pa Lubanga woko me teno kicika ducu, wek pe gutene ikom cel me Ot pa Lubanga. 7Dong kicika ma ingetegu gudoko malac kun gutinge woko wa malo likung iwi odi wadigi ki dul odi acel acel, ma guporo lac pa gin latyel kor kicika ma a ikom dul ot acel o kwede ikom dul ot mukene ma gurumu Ot pa Lubanga. Ci onongo bene tye yoo ma kiito kwede malo inget Ot pa Lubanga, kitmeno dano twero a ki i dul odi ma pinye dok kwede malo i dul odi matye i wiye me agiki, kun kato ki dul odi matye idyere. 8Ci aneno kabedo murumu Ot pa Lubanga bene otinge malo i kabedo ducu. Ci kipimo te guti ma ingete ducu ci kinongo ni bore oromo bor pa lagada acel marom ki puti apar. 9Dong dit me kom cel ma woko me kicika ma ingete ducu oromo puti aboro; ki dul abam ma kibwoto tye nono onongo romo puti aboro bene. Dok me a ki ikin abam me Ot pa Lubanga 10o kwede i kicika me dyekal ma gurumu Ot pa Lubanga woko litik, onongo lace romo puti pyere adek wiye aryo. 11Dogola me kicika ma ingetegu ducu gukemo abam ma onongo kibwoto tye nononi. Dogola acel okemo yo tung kumalo, ki dogola mukene okemo tung kupiny, dong lac pa dul ma kibwoto odong nononi onongo romo puti aboro ma orumu ot woko ducu.

Gedo matye tung kupotoceng

12Ot mo ma onongo okeme ki Ot pa Lubanga ki tung kupotoceng onongo lace romo puti miya acel ki apar wiye aryo, ki cel ma orumu onongo dite romo puti aboro; ki bore onongo romo puti miya acel ki pyere angwen wiye angwen.

Kit pim ducu ma kipimo ki Ot pa Lubanga

13Lacen danonu dok opimo Ot pa Lubanga, bore obedo puti miya acel ki pyere abicel. Dok opimo pinye ki tung inge Ot pa Lubanga dok kwede ariari tung idyekal, medo ki gedo ki cele, bore oromo puti miya acel ki pyere abicel. 14Nyim Ot pa Lubanga ma okemo tung kunyango ki dyekale, onongo romo puti miya acel ki pyere abicel. 15Ka dok opimo bor pa gedo ma onongo okeme ki dyekal ma onongo tye tung kupotocengi, ki cele ducu ryoryo, oromo puti miya acel ki pyere abicel.

Lok mukene ducu mamako Ot pa Lubanga

Kicika madite ma kidonyo kwede i Ot pa Lubanga, ki kicika ma i iye, ki kicika ma i dogola me donyo matye tung woko, 16onongo kipetogi woko maber ki bao ma oumu kor ot woko ducu; gin adeki ducu onongo gitye ki wang dirica mapol mading. Ki malo ka wi dye ot i dogola me Ot pa Lubanga onongo kiguro kome ducu kirumu ki bao, cake ki idye ot ma dok piny o kwede malo wa i wang dirica (wang dirica onongo kiumugi woko) 17nio wa i kabedo matye malo ka wi dogola, wa i kicika ma i iye ki tung woko bene. Ci dong ki ikom cel murumu woko ducu ki i kicika ma i iye ki kicika madite, onongo kigoro cal lukerubi ki cal yadi otit.

18Ci kiketo cal yat otit ikin lukerubi ma gigwenye agwenya. Lakerubi acel acel onongo tye ki tur nyime aryo, 19tur nyim manen calo tur nyim dano onongo okemo otit ki tungcel, ki tungcel bene tur nyim manen calo tur nyim labwor okemo otit, ma kigorogi kirumu kwede Ot pa Lubanga woko litit; 20cake ki idye ot odok piny o kwede malo ka wi dogola gigoro iye cal lukerubi ki cal otit i kor ot.

Keno tyer ma kitiyo ki bao

21Bao me dogola ducu obedo latwoke angwen: ki inyim Kabedo Maleng onongo tye iye gin mo 22ma obedo calo keno tyer ma kitiyo ki bao. Onongo bore romo puti abic ki lace puti adek. Twoke ducu, ki tedi tere ki murumu ducu onongo kitiyo ki bao. Lacen danonu owaca ni, “Man aye meja ma kicibo cung inyim Rwot.”

Lok ikom dogola

23Ci onongo tye dogola laiye aryo i agiki me yoo ma donyo i kicika maditi, dok bene onongo tye dogola laiye aryo i agiki yoo ma cito i Kabedo Maleng makato ducuni. 24Kun dogola acel acel onongo kiyubu laiye aryo ma giwire giyabe idye ot kamaleng. 25Dok ikom dogola me kicika madite onongo kigoro iye cal lukerubi ki cal yadi otit, kit macalo onongo kong kigoro i kor ot me kicika ducuni. Ki tung woko onongo tye iye bolo me bao me gengo ceng matye inyim dogola me donyo. 26Dok bene onongo tye wang dirica mading tungcel, ki yadi otit tye tungcel ki tungcel, ikom cel ma inget kicika ma i dogola me donyo.