Daniel 1

Pwonye pa Daniel ki pa lureme

1:1—6:28

Awobe magi i kal pa Nebukadnejar

11

I mwaka me adeke me loc pa Yekoyakim rwot me Juda, Nebukadnejar rwot me Babilon obino i Jerucalem ci olwenyo ikome, ka orumu taun madit meno ci ocego woko liking. 22Rwot Lubanga omiyo Yekoyakim rwot me Juda i cinge, ci Nebukadnejar okwanyo jami mogo ma kitiyo kwedgi i Ot pa Lubanga, oterogi woko i lobo Cinar, ci oketogi i ot pa lubangane, ka dok oketo jami mukene i ot kano lim pa lubangane.

3Ci rwot Nebukadnejar ociko Acipenaj ma en ladit maloyo jo ma kikologi, me yero dano mogo ki ikin jo Icrael, jo ma gin lutino ker kacel ki lutino pa jo ma gin luye, 4awobe ma komgi pe kimwonyo, jo mabeco ma gupwonye ikit ryeko ducu, dok ma gikwiri, ki jo matye ki ngec ma oromo, ma gitwero tic i gangkal pa rwot, ki me pwonyogi ki nukuta ki leb pa jo Kaldaya. 5Rwot omiyogi ni gucam cam mabeco nino ducu, kit cam ma rwot camoni, ki mato kongo bwino ma rwot matoni. Gin omyero kipwonyogi pi mwaka adek; ci i agiki mwaka meno ka dong kikelgi gudok lutic pa rwot.

6Ci ikin jo magi onongo tye iye Daniel, Anania, Micael, ki Ajaria ma gin ducu dano me kaka pa Juda. 7Dong ladit maloyo jo ma kikolo ocako nyinggi kit man: Daniel olwongo ni Beltecajar, Anania en olwongo ni Cadrak, Micael olwongo ni Mecak, ki Ajaria dong en olwongo ni Abednego.

8Ento Daniel omoko tame pe me camo gin me kwer ki ikom cam mabeco pa rwoti, kadi ki me balo kome ki kongo bwino ma rwot matoni; pimeno en openyo Acipenaj ni oye tameni wek pe ebal kome kekene. 9Ci Lubanga omiyo Acipenaj obedo ki kica ikom Daniel. 10Ento Acipenaj owaco ki Daniel ni, “Alworo rwoda ma en rwot, ma oyero cam ma myero wucam ki ginamata ma myero wun wumat; kace oneno ni komi pe yot marom ki kom awobe wadiwu ma mwaka me ditogi bene rom ki megi, ci ibimiyo rwot neka woko.”

11Lacen Daniel owaco ki acikari ma onongo Acipenaj oyero me gwoko Daniel, Anania, Micael ki Ajaria ni, 12“Kong itemwa pi nino apar ladit, wek kibed kamiyowa cam apura3 aye wacam ki pii amata keken. 13Ka wek lacen dong inen komwa ci ipor ki kom awobe ma gicamo cam mabeco ma rwot bene camoni, ka dong itii giri kwedwa kit macalo ibineno ni opore.” 14Ci acikarinu owinyo lok meno ma kititeni, ci otemogi kumeno pi nino apar. 15I agiki me nino me apar kineno ni komgi leng dok gucwe bene makato awobe mukene ca ma gicamo cam pa rwot mabeconi. 16Cutcut acikarinu okwanyo cam mabeco ducu ki kongo bwino ki botgi, ci omiyo cam apura botgi wek gucam.

17Lubanga omiyo ngec mamalo bot awobe magi angwen, ikit kwayi nukuta ducu, omiyo gubedo kwiri ilok ducu ki i ryeko ducu, kun Daniel onongo niang i ginanyuta ki lek bene ducu.

18I agiki me kare meno ma rwot dong ocikoni kikelgi inyime, ci Acipenaj okelogi inyim rwot Nebukadnejar. 19Gubino gucung inyim rwot, ci rwot oloko kwedgi; ci ikin gi ducu pe kinongo ngat mo kadi ki acel marom ki Daniel, Anania, Micael ki Ajaria. 20Jo magi gidok ikwayi lok ducu ma rwot openyogi kwede, ci onongo ni gikato lutyet ki lukor tipu ducu matye ite kere tyen apar kulu. 21Ci Daniel omede ki bedo kunu nio wa i mwaka mukwongo me loc pa Ciro.